كود الرباط//

كيقول المثل كما تدين تدان، وبالدارجة المغربية السمطة كادور، هادشي لي واقع فمقاطعة حسان، من بين أهم المقاطعات لي كيترأس حزب التجمع الوطني للأحرار، بحيث أن رئيس هاد المقاطعة ادريس الرازي لي دار حرب شرسة ضد استمرار أسماء اغلالو في عمودية الرباط، ودار يدو مع البام باش يطيح اغلالو ونجح، اليوم الدور عليه.

مصادر من داخل مجلس مقاطعة حسان قالت لـ”كود” بلي ادريس الرازي فقد الأغلبية ومبقاوش كيحضرو ليه مستشاري الأغلبية لدورات المقاطعة، وهادشي كيعني بلي قريب يطير لأن تجديد الثقة قربات ولي كتكون بعد 3 سنوات من التدبير.

وحتى أنه في آخر دورة محضروش 7 نواب للاجتماع، مما يعني أزمة كبيرة داخل الأغلبية فهاد المقاطعة، خصوصا في ظل وجود اتفاق داخل قيادات الأغلبية بالعاصمة الرباط من أجل إبعاد الرازي من المقاطعة.

وقال هشام اقمحي، مستشار من حزب التجمع الوطني للأحرار، في اجتماع للي كان الأسبوع الفايت، مخاطبا رئيس مقاطعة حسان: “المجلس فقد الثقة فيك ويلا كتحترم راسك خصك تحط استقالتك وتمشي بحالك”.

وأضاف قمحي مخاطبا الرازي :”الأغلبية مشات ليك ويلا كتفهم خصك تقدم الاستقالة وتمشي فحالك”، متسائلا: “عن حقيقة 85 مليون ديال البنزين وفين كتمشي ويلا بررتيها مستعد نقدم الاستقالة ديالي”.

وأوضح ذات المستشار: “85 مليون ف2023 و85 ف2024 و85 مليون ف2025 كيفاش درتي ليها فميزانية البنزين، والله متقدرش تعطيني الوثائق”، مضيفا: “حتى كراء السيارات، معارفينش شحال من سيارة تكرات”.