كود السوالم//
هادي كارثة بيئية بصاح، وداكشي اللي كيوقع منذ أسابيع فشاطئ البراهمة، التابع لجماعة السوالم الطريفية ولا كيدير الخوف، وكا يحيل على زمن السيبة بحال إيلا ما كاين مراقبة ولا محاسبة.
السكان صرحوا ل (گود) إن الشاحنات ولات جاية ليل ونهار كتفرغ فمخلفات البناء والحفر وسط الشاطئ، بحال إلى الشاطئ ولا مطرح ديال الزبل والنفايات الصلبة.
الساكنة ديال دوار البراهمة كتأكد باللي هاد الشاحنات جاية من نواحي حد السوالم وحتى من أوراش البناء والهدم كاينة فدار بوعزة التابعة لعمالة إقليم النراصر ، وكا تستغل الصمت ديال السلطة المحلية بجماعة السوالم الطريفية والتواطئ ديال “لمقدم” اللي خدام تما، باش تفرغ هاد الكمية الكبيرة من النفايات في الطريق إلى البحر و تخلف ركامات كبيرة ديال الحجر والتراب .
الدور ديال السلطة المحلية هنا كبير وخطير، حيث هي المسؤول الأول على حماية المجال البيئي ديال الجماعة، وهاد السكوت كا يوصفوه السكان بمثابة ترخيص.. واش معقول الشاحنات تدخل وتخرج قدام أعين الجميع بلا ما يكون شي تدخل صارم..؟
واش هاد الشاطئ اللي كيمثل متنفس للساكنة يبقى عرضة لتخريب ممنهج بهاذ الطريقة؟
اللي خاص دابا هو تدخل فوري من طرف السلطات، مراقبة صارمة، وخاص العامل الجديد ديال عمالة إقليم برشيد يتدخل من اجل محاسبة المسؤولين على هاد الكارثة، قبل ما يتحول شاطئ البراهمة من منتزه طبيعي لمزبلة رسمية، وبذلك كتكون جماعة السوالم الطريفية ساهمات فقتل البحر والطبيعة اللي تابعين ليها.
