كود – اولاد عزوز ضواحي كازا //
سلطات اولاد عزوز حاسمة فموضوع ترياب الهونگارات فاولاد عزوز ضواحي الدار البيضا والتابعة لاقليم النواصر. بدات الاثنين بهونگار رئيس جماعة سابق. حسب ما توصلات بيه “كود” فالسلطات عايقة بالتنوعير والفتوى الغبية اللي تعطات لهاد الرئيس السابق المعزول. كانت الخطة هو تهديدو للسلطات باش يحرق راسو باش تتراجع على كاع الكونگارات. السلطات بقات حتى هرب وغادي يتابع بالقانون الجنائي، باش ريبات ليه الهونگار ديالو.
خطة هاد الهارب كانت توقف العملية كلها. فشلات وتفرشو اللي وجدوها
البارح كانت نوبة هونگار حولو مولاه بمصنع البلاستيك. طبعا كاين تواطؤ من شي وحدين فالسلطة مع هادو اللي كيخرقو القانون. المغرب من كوب 21 اللي تعقدات فمراكش منع البلاستيك. واخا رجعات بشكل عادي بسباب ضعف وزير التجارة والصناعة فهاد الحكومة.
المهم نرجعو للهونگارات، يتوقع اليوم او غدا تريب السلطات جوج هونگارات ولاو مصنع. دايرين الصناعة الغذائية فمنطقة فلاحية وهادا ممنوع.
حسب مسؤول من السلطات ل”كود” فغاديين يريبو لكلشي. ما غادي يستثنى حد. حسب ما علمته “كود” فالسمسار الطاشرون لملايري اللي كيستغل الصحافة واللي داخل فحرب مع وزير الداخلية لفتيت، داير جهدو كولو باش يستثنيوه. باغي يعاود اللي وقع هادي سنوات. كان قرار الهدم ودخلو شي وحدين كبار ولكن ما عندهمش الغيرة على تطبيق القانون وفلت منها.
هاد المرة الدولة حاسمة وصارمة. كاين قرار الهدم غاديين يريبو ليه. من حقو يلجأ للقضاء ويتبع المساطر القانونية ولكن ما غاديش يوقف هاد العملية اللي همها الصالح العام
