كود سبور//

صدرت السلطات الإسبانية قرار باعتقال لويس روبياليس الرئيس السابق للاتحاد الإسباني لكرة القدم، بسبب شبهات بارتكاب شي حوايج خارج القانون خلال مرحلة تسييرو لاتحاد الكورة ديال بلادو.

وحسب جريدة “ماركا” الإسبانية، فالمدعي العام الإسباني صدر مذكرة اعتقال فحق لويس روبياليس المتهم بخرق القانون خلال فترة رئاستو للاتحاد، وهذا الشي داخل ضمن سلسلة الاعتقالات اللي تشدو فيها اليوم عدد من المسؤولين فالاتحاد الإسباني لكرة القدم، وكون كان فالصبليون دابا كون حتى هو مشدود.

نفس المصدر، وضح أن الأسباني لويس روبياليس كاين دابا خارج الصبليون، وبالضبط كاين فجمهورية الدومينيكان وان الأخيرة ما عندها حتى شي معاهدة مع إسبانيا لتسليم المبحوث عليهم او المحكوم عليه، وأكد نفس المصدر نفسو ان السلطات الإسبانية عندها ثقة بأن لويس روبياليس غيرجع بخاطرو لاسبانيا.

ومقربلة فالصبليون بسبب حملة من الاعتقالات ديال السلطات الإسبانية اللي دايرها على مسؤولين فالاتحاد الإسباني لكرة القدم، بسبب تهم ديال الفساد المالي والإداري وغسيل الأموال، ومن بين الحوايج اللي فرگعو هاد القضية صفقة نقل كاس السوبر الإسباني للسعودية وهي الصفقة اللي كان سناها لويس روبياليس المتابع ديجا فقضية تحرش جنسي.