گود سبور//

كشف طارق السكتيوي مدرب المنتخب الوطني المغربي المشارك فـ كأس العرب 2025، المقامة حاليا بقطر، أنه كاين حافز كبير داخل ليكيب ناسيونال للتغلب على منتخب الإمارات غدا الاثنين فـ الدومي فينال والتأهل للنهائي، وأن الجمهور المغربي عاطيهم دفعة كبيرة باش يربحو ويفرحوه.

وهضر طارق السكتيوي اليوم الاحد خلال الندوة الصحافية اللي كاتسبق ماتش المغرب والإمارات فـ دومي فينال كأس العرب، وقال: “الفرحة ديال 40 مليون مغربي اللي كايتسناونا هي الشعلة اللي كاتخلينا نخدمو ونوجدو الماتش ونخدمو فـ هاديك 90 دقيقة، وهادي من الحوايج اللي كاتعطينا قوة واخا الصعوبات، ولكن هاد الأمور كاتكون حافز ودفعة لينا للتغلب على هاذ الصعوبات”.

وكمل السكتيوي: “كانت صعوبات كثيرة خلال بداية الاستعدادات وخصوصا الأسبوع الأخير قبل ما نجيو وما كاينش شي ماتش لعبناه وحنا مرتاحين ولكن حاولنا بتركيز وحرفة كبيرة وذكاء نتعاملو مع الخصوم والأمور دابا غاديا بطريقة مزيانة، وحتى فـ ماتش غدا ضد الإمارات غادي نتعاملو بذكاء مع النقائص والصعوبات اللي غادي نواجهوها باش ملي يصفر الحكم حنا اللي نكونو مؤهلين للفينال واللي كايتسناه 40 مليون مغربي”.