كود سبور//

اكد طارق السكتيوي مدرب المنتخب الوطني المغربي المحلي، ان ليكيب ناسيونال واجدين لماتش فينال كاس افريقيا للمحليين ضد منتخب مدغشقر غدا السبت بالعاصمة الكينية نيروبي، باش يربحو اللقب ويشرفو الكورة المغربية.

وهضر طارق السكتيوي خلال الندوة الصحافية اللي كاتسبق الفينال بين المغرب ومدغشقر، وقال: “حنا محترفين والاحتراف عندو مزايا وخصائص ديالو، وملي كاتكون كاتوجد لماتش الفينال كتمثل البلاد ديالك، وهاد الصعوبات كاملة اللي دازت و 7 السيمانات ولا 8 ملي بديت كانوجد مع اللاعبين اللي كانو من قبل ومن شهر اكتوبر ديال العام اللي فات، كانظن ان ما يمكنش الانسان ما يمكونش مسؤول وعارف القيمة ديال شنو تدار، ولا شنو خاصو يتدار”.

وزاد قال السكتيوي، واكد: “الفينال كاتعطيك لقب ومن بعد 90 دقيقة اما كايتكتب لك اللقب ولا ما كايتكتبش لك هذا اللقب، والكل واعي بهاد المسؤولية وحنا على أتم الاستعداد باش نضحيو بالغالي والنفيس ونشرفو كورة القدم المغربية”.