كود سبور//

أكد طارق السكتيوي مدرب المنتخب الوطني المغربي الأولمبي أن المستوى اللي وصلت له كرة القدم المغربية هو بفضل الملك محمد السادس والرؤية ديالو بالإضافة إلى الخدمة ديال الجامعة الملكية المغربية برئاسة فوزي لقجع، وقال إن اللاعبين يستاهلو الميدالية الذهبية فأولمبياد باريس2024، وأنه باغيين يربحو الصبليون فالدومي فينال ويتأهلو للنهائي باش يفرحو الملك والجمهور المغربي، واعترف بأن الماتش غايكون صعيب.

وقال طارق السكتيوي فتصريح للموقع الرسمي للجامعة الملكية المغربية لكرة القدم على هامش آخر حصة تدريبية قبل دومي فينال أولمبياد باريس ضد الصبليون: “كرة القدم المغربية كتعرف فالسنوات الأخيرة تطور كبير على جميع الأصعدة، وهذا الشي بفضل الملك محمد السادس، والرؤية ديالو الصائبة والتوجيهات ديالو، وبعدها العمل الكبير اللي قام به فوزي لقجع رئيس الجامعة الملكية المغربية لكرة القدم، والتمار دابا بدات كتعطي وولينا كانشوفو المنتخب المغربي وحنا راسنا مرفوع وأي مغربي فخور بهذا الشي اللي وصلت له الكرة المغربية، ولكن خاصنا نكونو متعطشين اكثر لتحقيق ما هو أفضل”.

ووضح السكتيوي: “الماتش غايكون صعيب ويكفي أنه دومي فينال فالألعاب الأولمبية، والكل واعي بالمسؤولية اللي عليه، وديما كنقول إنني فخور بالتواجد مع هاد الرجال اللي لمسنا فيهم حب كبير للوطن وغيرة كبيرة على العلم، ومسؤولية كبيرة لتطوير كرة القدم والرقي بها وإعطاؤها المكانة اللي كاتستحقها ومشكورين على المجهودات ديالهم وروح لگروب اللي عندهم ورغبتهم فتشريف الكورة المغربية وادخال الفرحة على ملكنا وجمهورنا، وكانتمنى نتأهلو للفينال حيث بكل بساطة هاد اللاعبين يستاهلو يكونو فالفينال ويربحو الميدالية الذهبية لما لمسنا فيهم من تضحيات وامكانيات تقنية وتكتيكية.”

وأكد السكتيوي: “الماتش غايتلعب على جزئيات بسيطة، والمنتخب الإسباني مكشوف لنا كيفما حنا مكشوفين له. تلعبو بزاف ديال الماتشات والأمور دابا واضحة وما بقاش عامل المفاجأة اللي كان كل مدرب كايبغي يديرو باش يضرگ نقاط القوة والضعف ديالو، دابا حنا عارفين نقاط قوتهم وضعفهم وهما عارفين نقاط قوتنا وضعنا، خاصنا نكونو واجدين ملي يصفر الحكم بداية الماتش ونبقاو مركزين والمنتخب اللي عندو رغبة اكثر ومركز اكثر واللي عرف يضبط المشاعر ديالو هو اللي غايربح الماتش وحنا ما عندناش شي خيار آخر من غير أننا نربحو”.