كود سبور//

أكد طارق السكتيوي أن الماتش بين المنتخب المغربي الأولمبي وأوكرانيا برسم الجولة الثانية من دور مجموعات أولمبياد باريس 2024، كان صعيب بزاف، وأنهم ما كانوش يستاهلو الخسران وأنهم كانو قراب للرباح ولكن هادي هي الكورة ومزيان ملي وقع هذا السيناريو دابا ماشي فدور متقدم من البطولة، حيث مازال الماتش الثالث ضد العراق اللي خاصهم يربحوه لتدارك الموقف والتأهل إلى الدور الثاني.

وهضر طارق السكتيوي وقال فتصريح له على خسارة المنتخب المغربي أمام أوكرانية: “الماتش كان صعيب فالشوط الأول وحتى قبل ما يبدا گاع الماتش كان صعيب بحكم عوامل كثيرة، حيث كان الخصم خاصو يربح وحتى حنا كان خاصنا نربحو وفالشوط الأول ماركاو علينا من هجمة مرتدة وهذا الشي دخلنا فالشك فواحد الوقت قبل ما نرجعو فالماتش تدريجيا وفالشوط الثاني بداو كايلعبو ببرودة اكثر وحنا بدلنا من اللعب ديالنا وضغطنا عليهم كثر وطلعنا الخنوس قربناه لحدا رحيمي ومع الوقت دخلنا فالماتش ولينا كنبانو لاعبين مزيان وأن الهدف جاي، وهذا الشي اللي تحقق بعدما خلقنا بزاف ديال الفرص”.

وزاد وضح السكتيوي: “الطرد ماشي ديما كيكون فصالح الفريق اللي عندو زيادة عددية، حيث الفريق الخصم كايولي يدافع وكايولي عندو تضامن زايد وحنا كان علينا نوعو من طريقة اللعب ديالنا ولكن هذا الشي ما نجحناش فيه وما قدرناش نماركيو الهدف الثاني واخا كنا خطيرين والخطأ اللي درنا فالماتش أننا طمعنا وقلنا هادي فرصة ما خاصناش نضيعوها بالنظر للفرص اللي خلقنا وكنا قرابين للرباح ولكن تعرضنا لهدف قاتل وما عندنا ما نديرو اللي وقع وقع”.

وأكد طارق السكتيوي: “دابا مازال عندنا ماتش آخر، ومزيان هاذ الشي وقع لينا دابا، وغادي ناخدو الدروس منو ومازال عندنا ماتش ثالث باش نعوضو ومزيان هذا الشي ما وقعش لنا فربع النهائي او دور آخر وخاصنا دابا نوجدو الماتش الثالث باش نربحو ونتكاليفاو”.