گود سبور//

بين طارق السكتيوي مدرب المنتخب الوطني المغربي اللي ربح كأس العرب 2025، الفطنة والذكاء ديالو، وما بغاش يبان بلي كايشوش على وليد الرگراگي مدرب المنتخب الوطني المغربي الأول قبل أيام قليلة من كاس أفريقيا 2025.

وبعد تتويج طارق السكتيوي بكأس العرب، سولو صحافي قناة الكأس العربية، على المستقبل ديالو وواش غايشد المنتخب الوطني المغربي الأول، بمناسبة التصريحات اللي كان قال المدرب المغربي الآخر جمال السلامي، اللي كان قال أنه كايشوف بلي السكتيوي هو اللي غايشد المنتخب المغربي الأول بعد كأس إفريقيا وكاس العالم.

ولكن طارق السكتيوي كان مريگل وجاوب وقال إن المنتخب الوطني المغربي الأول عندو المدرب ديالو دابا (الرگراگي) وقال له أنا عندي خدمتي، وراوغو مشى كايهضر له على الإكراهات اللي واجهاتو قبل كأس العرب من إصابات وعياء اللاعبين.