گود سبور//

أكد طارق السكتيوي مدرب المنتخب الوطني المغربي المحلي، ان ثقة لاعبين المنتخب فريوسهم وقرة شخصياتهم كانت لها دور مهم فالرباح اللي تحقق على منتخب الكونگو الديمقراطية يوم الأحد فنيروبي، برسم الجولة 5 من دور مجموعات كاس افريقيا للمحليين والتأهل إلى ربع النهائي.

وهضر طارق السكتوي فتصريح له بعدما ربح المغرب الكونگو الديمقراطية بنتيجة 3-1، وقال: “فرحانين بزاف بهذا الرباح اللي كان على منتخب قوي، واللاعبين ديالنا بينو على انهم قادرين يلعبو بثقة وشخصية قوية فاللحظات الحاسمة”.

وكمل طارق السكتيوي وقال: “كلما داز الوقت اللاعبين كيزيدو يتحسنو، لعبو 4 الماتشات فوقت قصير ولكن قدرو يصمدو مزيان، وبداو يعرفو بعضياتهم كثر وكايطرو مستواهم باش يطورو للعب ديالهم ما بعضياتهم، واللاعبين عندهم طموح كبير لتكريم كرة القدم الوطنية فهاد المسابقة، وما غاديش نستسلمو، وغانديرو جهدنا كامل للتأهل فالأدوار الجايا”.

وزاد السكتيوي، وقال: “كاينة واحد الروح زوينة كاتزيد تتقوى داخل المجموعة طاغية عليه المسؤولية حمل قميص المنتخب الوطني والرغبة فالتشريف ديالو، وأنا فرحان بالماتش اللي دار اسامة المليوي وفرحان للاعبين كاملين على العطاء ديالهم”.

بخصوص الماتش ضد الكونگو الديمقراطية، قال: “بدينا الماتش مزيان، واخا تعرضا للضغط من الكونگو الديمقراطية ورجعنا للور بدينا نلعبو الباسات الطوال بلاما نقصدو، وفالشوط الثاني درنا تغييرات وبدلنا الماتش ودرنا الفرق”.

وأكد السكتيوي: “هذا الرباح غايعطينا فرصة التأهل إلى ربع النهائي، وحنا فرحانين بالتأهل إلى الدور الجاي وهذا الشي جا بخدمة اللاعبين ومجهودهم الجماعي”.