كود سبور//

أكد طارق السكتيوي مدرب المنتخب الوطني المغربي الاولمبي، أن ليكيب ناسيونال واجدين لمواجهة أوكرانيا غدا السبت فالدور الثاني من دور مجموعات “أولمبياد باريس”، وأن الهدف ديالهم هو يربحوه باش يضمنو التأهل إلى الدور الثاني ولو انه ما غايكونش ساهل، وباغيين يمشيو لأبعد نقطة فالبطولة باش يفرحو المغاربة.

وهضر طارق السكتيوي فتصريح للموقع الرسمي للجامعة الملكية المغربية لكرة القدم، وقال: “الماتش ضد أوكرانيا غايكون صعيب، بحال ماتش الأرجنتين اللي كان قبل منو وبحال ماتش العراقي اللي غايجي وراه، وحنا جميع المباريات مهمين عندنا، وكانتعاملو باحترافية واللاعبين حتى هما وعارفين المسؤولية اللي علينا وعارفين انه ما كاينش شي ماتش فبطولة من هذا المستوى الاحترافي كايكون ساهل”.

وكمل السكتيوي: “الرباح ديالنا على الأرجنتين جا بواحد جا بعزيمة وتركيز كبير وبروح وتضامن ومجهودات كانت فوق التيران ومن واجبنا نربحو الماتش الجاي والى بغينا نربحو خاصنا نديرو نفس الخدمة اللي درنا فماتش الأرجنتين سوا قبل من المباراة او خلال المباراة وحتى يصفر الحكم”.

وزاد أكد السكتيوي: “الفرحة بالرباح على الأرجنتين سالينا منها البارح ودابا حنا غاديين للماتش ضد اوكرانيا غدا، وعارفين الأهمية ديالها حيث الرباح كايضمن لنا التأهل للدور الثاني، ويبقى لينا الماتش الثالث ضد العراق اللي يكون لنا فرصة باش نتأهلو حنا الاولين من الگروب ونقدرو نمشيو لأبعد نقطة ممكنة ونفرحو الشعب المغربي”.