كود سبور//
عبر طارق السكتيوي مدرب المنتخب الوطني المغربي الأولمبي على الفرحة ديالو حيث المنتخب المغربي تأهل للمرة الثانية فتاريخو إلى ربع نهائي الأولمبياد، من خلال أولمبياد باريس 2024.
وقال طارق السكتيوي فتصريح له بعد فوز المغرب على العراق بثلاثة لزيرو فالجولة الثالثة من دور مجموعات الأولمبياد والتأهل إلى ربع النهائي: “الحمد لله على هذا الرباح والتأهل، الرجال (اللاعبين) عندهم غيرة كبيرة على الوطن وبغينا كاملين نفرحو الشعب المغربي”.
وكمل السكتيوي: “المنتخب المغربي كان مزيان بزاف سوا فالتنشيط الهجومي أو فالفرص اللي جاوه فالماتشات بثلاثة والماتش ضد أوكرانيا كان صعيب وكان صفعة ولكن ربّ ضارة نافعة خلانا نراجعو أوراقنا والأشياء اللي خلات الماتش يمشي لنا ورد الفعل اليوم كان ديال رجال وباغيين يفرحو المغاربة”.
وزاد السكتيوي: “دخلنا ضد العراق بعزيمة كبيرة وقدرنا نربحو وانا فرحان بهذا الإنجاز اللي من شحال هذا ما حققناه وربحنا 2 ماتشات وعمرها موقعت وحققنا دابا الهدف رقم 1، وبالنسبة للهدف الثاني فالأبواب كلها محاولة وحق مشروع أننا نمشيو حنا والجمهور المغربي العظيم لتحقيق الفرحة الكبيرة ولكن دابا المحطة المقبلة هي المباراة الجايا ديال ربع النهائي فباريس”.
