كود سبور//

عبر طارق السكتيوي مدرب المنتخب المغربي الأولمبي على الفرحة ديالو الكبيرة فالإنجاز اللي حقق المغرب بالتأهل إلى دومي فينال أولمبياد باريس 2024، ونسب هذا الإنجاز للاعبين.

وقال طارق السكتيوي فتصريح بعدما المنتخب المغربي ربح المريكان فربع نهائي أولمبياد باريس بـ4 لزيرو، وتأهل إلى نصف النهائي: “ما يمكنش لكم تصورو شحال اللاعبين كايحبو العلم الوطني، وكيفاش كايلعبو وتحملهم للمسؤولية وديما دايرين الجمهور المغربي فبالهم”.

وكمل السكتيوي: “حنا فرحانين بزاف بهذا الشي اللي وصلنا له واللاعبين رجال وراهم كايكتبو فالتاريخ، الماتش اللي فات ما كانش ساهل واليوم الماتش كان أصعب وكان تكتيكي كثر ولكن اللاعبين كانو عند حسن الظن وما خيبوناش”.

وأكد السكتيوي: “اللاعبين خدمو بزاف من أول يوم وما كانش ساهل علينا هذا الشي حيث كانت عندنا تقريبا 10 أيام باش نوجدو واللاعبين رجال وكايخدمو وضحاو بزاف بزاف سوا فالاستعدادات أو فالماتشات كنوجه لهم تحية كبيرة وكانقولهم كانبغيوكم”.