كود سبور//

أكد طارق السكتيوي مدرب المنتخب الوطني المغربي الأولمبي أن اللاعبين واجدين لماتش ربع النهائي اللي غايلعبوه غدا ضد منتخب المريكان فأولمبياد باريس، وأنهم باغيين يربحو ويتأهلو للدومي فينال باش يفرحو الملك محمد السادس والشعب المغربي.

وعلى الهامش الحصة التدريبية الأخيرة للمنتخب الوطني المغربي قبل ماتش المريكان، قال طارق السكتيوي فتصريح للموقع الرسمي ديال الجامعة الملكية المغربية لكرة القدم: “الماتش ما غايكونش ساهل بالنسبة للمنتخبين بجوج، حيث هاد المرحلة فيها خروج المغلوب وخاصنا نغلبو ماشي نتغلبو وورانا واحد الجمهور عظيم معنا فالعقل والقلب ديالنا والعلم ديالنا اللي كانبغيوه وكتغيرو عليه وكاينة رغبة كبيرة لتحقيق الرباح”.

ووضح طارق السكتيوي: “حنا عارفين الرباح ما كايتعطاش ولكن ينتزع وخاصنا نكون فماتش غدا فكامل اللياقة البدنية والدهنية ديالنا باش نقدرو نتعاملو من الناحية التكتيكية بطريقة جيدة سوا دفاعيا أو هجوميا، ونحاولو نقصو من خطورة الخصم ونقاط القوة ديالو، ونمشيو فنقاط الضعف ديالهم ونستاغلوها لأقصى حد”.

وزاد أكد السكتيوي: “للاعبين عندهم رغبة كبيرة وتفاني كبير وحماس باش يربحو هذا الماتش ويتأهلو للدومي فينال وباغينا نفرحو الملك محمد السادس والشعب المغربي”.