كود سبور//

اكد طارق السكتيوي أن المنتخب الوطني المغربي الاولمبي، ما مشاش لأولمبياد باريس غير من أجل المشاركة، ولكن مشى باش يربح وعلاش لا يوصل للفينال ويفرح المغاربة، ووضح ان الماتش ضد الأرجنتين صعيب ومهم بزاف، ولكن الماتشات اللي وراه حتى هما بحالو فالأهمية.

وهضر طارق السكتيوي مدرب المنتخب المغربي الاولمبي قبل ماتش الأرجنتين الافتتاحي فأولمبياد “باريس 2024″، اللي ملعوب غدا الاربعاء فسانت اتيان، وقال فتصريح للموقع الرسمي للجامعة الملكية المغربية لكرة القدم: “التمثيل ديالنا للمغرب فالأولمبياد هو شرف لنا، وحنا ما بغيناش يكون فقط شرف المشاركة ولكن بغينا نشرفو الكورة المغربية وحنا كاملين عازمين باش نديرو مسار اللي يبغيه كل محب للكورة المغربية”.

وبخصوص الماتش ضد الارجنتين، قال السكتيوي: “او ماتش لنا ضد منتخب الأرجنتين وهي مباراة افتتاحية ومصيرية ومهمة بزاف، ولكن ماشي غير ماتش ديال الأرجنتين، راه عندنا ماتش الأرجنتين وماتش أوكرانيا وماتش العراق، وحنا عازمين نديرو فيهم نتائج مزيانين باش نتأهلو للدور الثاني، ومن بعدها نبداو فتحقيق حلمنا بالانتصارات باش نوصولو للفينال، ولكن هذا الشي ما غايجيج إلى ما دزناش من الماتشات الاولين بما فيهم ماتش الأرجنتين، ماكاينش ماتش سهل وصعب والماتش ضد الأرجنتين صعيب علينا وعليهم”.