عمر المزين – كود///

كشف مايك هاكابي، سفير الولايات المتحدة الأمريكية فإسرائيل، على لقاء دار بينو وبين عبد الرحيم بيوض، رئيس مكتب الاتصال المغربي بإسرائيل، وذلك فإطار مواصلة النقاشات المرتبطة باتفاقات أبراهام وآفاق تطويرها.

وجا هاد المعطى فتدوينة نشرها السفير الأمريكي فحسابو الرسمي بموقع (X)، قال فيها باللي اللقاء كان “مزيان”، وتم خلالو استكمال النقاش حول اتفاقات أبراهام، مؤكداً أن الولايات المتحدة “ملتازمة تبني على النجاحات اللي تحققات فهاد الاتفاقات”.

وأضاف هاكابي أن واشنطن كتشوف لقدّام وكتتطلع تكمّل الخدمة والتنسيق مع مكتب الاتصال المغربي–الإسرائيلي، فإشارة واضحة إلى استمرار الدعم الأمريكي لمسار التطبيع وتعزيز التعاون بين الأطراف المعنية.

هاد اللقاء كيجي فواحد السياق اللي كتسعى فيه الولايات المتحدة تحافظ فيه على الزخم ديال اتفاقات أبراهام، واللي كتعتبرها ركيزة أساسية فالسياسة الخارجية ديالها فالمنطقة، بهدف دعم الاستقرار وتوسيع مجالات التعاون السياسي والاقتصادي.

وكتبيّن هاد التدوينة حتى المكانة اللي كاتحظى بها المملكة المغربية فهاد المسار، باعتبارها شريك أساسي فدينامية الانفتاح والحوار الإقليمي، وفق مقاربة قائمة على التنسيق المستمر مع الولايات المتحدة وخدمة المصالح المشتركة.