كود – كازا //

خرجات وزارة الحج السعودية بقرار جديد كايمنع التصوير بجميع الأدوات فالحرمين الشريفين، هاد الخطوة كاتهدف حسب بلاغ الوزارة الحفاظ على الأجواء ديال العبادة وتهيئ الجو المناسب لها، القرار اللي جا بناء على تعليمات من وزارة الحج والعمرة، كايشمل جميع الحجاج والمعتمرين كيف كيف، وكايشدد على الأهمية ديال الالتزام باش ما تكونش عقوبات.

وحسب البلاغ اللي خرج من وزارة الأوقاف والشؤون الدينية، فالقرار كايقول باش يقلال التشويش وإثارة المشاعر اللي تقدر تجي من التصوير وسط الحرمين، وأكدات الوزارة على أن الجهات المختصة فالمملكة العربية السعودية غاتصادر الصور وفيديوهات، وحتى آلات التصوير نفسها، إلا شي واحد خالف القرار.

وزارة الحج شرحات هاد القرار على أنه كيبغي يحافظ على جو ديال الخشوع وسط الحرمين، ولكن هاد القرار الجديد كيطرح أسئلة على الأسباب الحقيقية لي من وراه، حيث مؤخرا انتشرو فيديوهات كتبين مشاهد ديال العنف والاعتداءات فموسم الحج وزحام والتحرش، كاين اللي كايشوف بأن القرار يقدر يكون عندو علاقة بالرغبة فمعالجة هاد القضايا الأمنية، او محاولة باش يحجبو الصور والفيديوهات اللي تقدر تبين وتفضح اش كيوقع تما .

القرار واخا كايقول بأنه كايحمي الحجاج وكايضمن سلامتهم، كيطرح فالمقابل أسئلة على الشفافية ومنع التصوير لي يقدر يعرقل توثيق أي تجاوزات أو انتهاكات اللي ممكن توقع، الشي اللي يقدر يخلي الناس تخاف على قدرة الحجاج باش يبلغو على أي مشاكل، وحتى على قدرة العالم باش يراقب الأوضاع وسط الحرمين.