عمر المزين كود ////

عرفات أكادير فالساعات الأولى من صباح اليوم الخميس عملية سطو كتشبه للأفلام الأمريكية، وهادشي وقع مورا الثالثة صباحا مني دخلو شي شفارة على عائلة كلها تتكون من مرا و3 من بناتها والوالدين ديالها.

الضحية هضرات معاها “كود”، وأكدت بلي هي نازلة فواحد لوطيل مصنف واسمو “Flat hotel agadir” وخدات هي وعائلتها شي سيمانة باش يدوزو العطلة، واليوم فالصباح بكري تفاجئوا بالشفارة دخلوا عليهم من الشرجم ديال الكوزينة وهوما ناعسين.

هاد السيدة وضحات باللي مشافوش هوما هاد الشفارة، وأضافت: “يقدرو يكونو دخلو علينا مع داك الثالثة ونصف أو الرابعة ديال الصباح، وهزو لينا الصيكان وخواوهم فالحمام، ومن بعد هادشي هزو لينا حتى السيارة ومشاو.. الطوموبيل كانت واقفة حدا لوطيل.. وراه عندهوم كاميرا والبوليس مني جاو شافو كولشي ووراونا حتى داك اللقطة وكبيان غير التالي ديال السيارة غادية.

وبخصوص واش تعرفو هاد الشفارة أو مزال، فقد أكدت هاد السيدة باللي مزال هي معارفاش واش الملاحم ديالهم واضحين فالفيديو او اللا، مؤكدة باللي دبا البحث متواصل، وأشارت باللي الشفارة خداو ليهم فلوس والذهب (جوج كورميطات وخاتم وبورطابل آيفون 7، ولفلوس اللي مشات تقدم بشي 26 ألف درهم، وعاد شي فوس متفرقة وتتراوح بين 700 درهم و1000 درهم

الضحية وجهت صرخة عبر “كود” على هادشي اللي وقع ليها مع عائلتها وبغا هاد المساخيط يتشدو وترجع السيارة ديالها، وزادت قالت باللي هادشي تعرف مباشرة بعدما فاقت الوالدة ديالها فوقت لفجر، وقالت باللي دبا تبين أن الفندق غير مؤمن وخا مصنف.