گود سبور//

تفرش الكذوب ديال هشام ايت منة رئيس الجمعية الرياضية لنادي الوداد الرياضي، بخصوص الشركة الرياضية للنادي والتطاول على اختصاصات ومهام ماشي ديالو، وهي الحقيقة اللي كان نشرها جورنال “گود” قبل اشهر، بأن ايت منة راه كايسني العقود مع المتعاقدين مع الوداد بلاما يكون هو الرئيس ديال الشركة الرياضية للنادي وهذا الشي فيه خرق للقانون وانتحال صفة حيث ما عندوش الصفة القانونية لابرام التعاقدات بإسم شركة الوداد الرياضي اللي ماشي هو رئيسها.

وكشفت وثيقة ديال السجل التجاري لشركة الوداد الرياضي كذوب هشام ايت منة، وأنه كان مغرق عدد من الوداديين فـ الكذوب فيما يتعلق بالشركة الرياضية وتسييرها وخصوصا الاتباع ديالو والطبابة والغياطة المحسوبين عليه، اللي غرضهم هو الاستفادة من الوداد وماشي مصلحة النادي، وها هو السجل التجاري لشركة الوداد بتاريخ البارح الجمعة 7 نوفمبر 2025، فيه ان رئيس الشركة الرياضية للوداد هو سعيد الناصيري.

هذا الشي كايعني ان الرئيس الفعلي والحقيقي لشركة الوداد الرياضي هو سعيد الناصيري اللي ما عاطي حتى شي تفويض لهشام ايت منة او توكيل باش يتصرف فـ الشركة، وبالتالي فـ گاع هادوك التعاقدات اللي كايدير هشام ايت منة بإسم الشركة الرياضية ماشي قانونيين وفيهم انتحال صفة وتزوير، وراه والمنخرطين د النادي خلال آخر جمع عام للوداد رفضو يديرو لآيت منة توكيل باش يبدا الإجراءات فـ الشركة، واخا عيا يطلب ويزاوگ فيهم.

المصيبة راه ما واقفاش عند هنا، حيث هذا التخربيق ديال هشام ايت منة فـ الوداد غايحط النادي فـ واحد الوضع كارثي، راه العقود اللي برم ايت منة مع اللاعبين ومختلف المتعاقدين تعتبر لاغية حيث اللي وقعها ماشي الرئيس الحقيقي للشركة الرياضية للنادي اللي هو سعيد الناصيري، وإنما شخص آخر، وبالتالي هذا الشي فيه خرق للقانون، والاتحاد الدولي لكرة القدم راه من حقو يطالب باسترجاع منحة كاس العالم للأندية ويعاقب الوداد وحتى الاتحاد الافريقي اللي دابا الوداد لاعب مسابقة كاس الكونفيدرالية الإفريقية وهذا الشي كيف والو حيث العقوبات تقدر تفوت هذا الشي ببزاف وغايكون ايت منة دخل النادي فـ الغرق ديال بصح اللي صعيب يخرج منو.