گود سبور//

هداو لاعبين المنتخب الوطني المغربي التأهل لنهائي كأس العرب 2025، للملك محمد السادس والجمهور المغربي، وواعدو المغاربة بتحقيق اللقب.

وبعدما ربح المنتخب المغربي الإمارات، اليوم الاثنين فـ دومي فينال كاس العرب بثلاثة لزيرو وتأهل للنهائي، هضر حمزة المساوي وقال فـ تصريح له: “كانهدي هذا التأهل للجماهير المغربية، وللملك محمد السادس اللي كانهديو له هذا التأهل للفينال، وحنا فرحانين بهذا النهائي والهدف ديالنا هو نرجعو للمغرب بكاس العرب”.

وكمل المساوي وقال: “ماتش بماتش فـ البطولة راد الانسجام بين اللاعبين وبداو كايعرفو بعضياتهم وهذا الشي بدا كايعطي الأكل ديالو وفـ الفينال غادي نكونو فـ المستوى”.

أما كريم البركاوي فقال: “أهم حاجة هي تأهلنا للفينال وفـ الماتش د اليوم كان علينا نديرو كلشي باش نجيبو التأهل للنهائي، وكانشكر اللاعبين والجمهور اللي كان حاضر وساندنا بقوة وحضر بكثافة وكانشكر اللاعبين على الروح القتاليّة ديالهم”.

وزاد البركاوي وقال: “الماتش ما كانش ساهل وكانشكر المنتخب الإماراتي على الروح الرياضية ديالهم وحققنا المبتغى ديالنا اللي هو التأهل للنهائي، وخاصنا نفرحو دابا وغدا ننساو هذا الشي باش نوجدو للفينال”.