گود سبور//

واصل المنتخب الوطني المغربي تعزيز الرقم القياسي ديال سلسلة الرباحات المتابعين، ورفع الرقم لـ17 رباح بعدما ربح اليوم الجمعة منتخب موزمبيق فـ ماتش أميكال فـ تيران طنجة الكبير اللي كان الافتتاح ديالو فـ هاد الماتش.

وسالا الماتش بين المنتخب الوطني المغربي ومنتخب موزمبيق بنتيجة واحد لزيرو لمصلحة السبوعا، وهو الهدف اللي ماركاه عز الدين اوناحي من تسديدة زوينة فـ الدقيقة 7، ولكن من وراها ما قدروش الأسود يزيدو أهداف أخرى، وهذا الشي كايزيد يأكد ان المنتخب المغربي مازال كايعاني مع المدرب وليد الرگراگي مع المنتخبات اللي كايرجعو اللور يديرو لبلوك، ومازال ما لقى الحل، حيث واخا السيطرة ديال ليكيب ناسيونال على الكورة والفرصة الكثيرة اللي كايخلقو ما كايقدروش يوصلو لآخر الهجمة باش يساليوها بهدف، وهذا الشي قبل شهر و 7 أيام على كاس افريقيا.

وغادي يلعب المنتخب الوطني المغربي الماتش ضد منتخب انگولا ماتش ودي ثاني، ومن المنتظر يعطي فيه الناخب الوطني فرصة للاعبين اخرين، كيفما عطاها اليوم فـ ماتش موزمبيق لرومان سايس اللي رجع بعد عام ونص من الغياب، حيث عناصر أخرى غايبين بحال اشرف حكيمي ونايف أگرد اللي موعتين.