كود سبور//

واصل المنتخب الوطني المغربي العروض ديالو القوية، وربح منتخب ليسوتو بنتيجة كبيرة، اليوم الاثنين فتيران وجدة برسم الجولة 6 والأخيرة من اقصائيات كاس إفريقيا 2025، وحقق العلامة الكاملة 6 ديال الرباحات من 6 ديال الماتشات.

وسالا الماتش بين المنتخب الوطني المغربي ومنتخب ليسوتو بنتيجة 7 لزيرو لمصلحة الأسود، ماركا منهم براهيم دياز هاتريك فالدقيقة 5 والدقيقة 15، والدقيقة 42، وسفيان رحيمي ماركا 2 اهداف فالدقيقة 37، والدقيقة 45 من بينالتي، والاحتياطيين اللي دخلو فالشوط الثاني يوسف النصيري فالدقيقة 68، وإسماعيل الصيباري فالدقيقة 70.

المنتخب الوطني المغربي اللي أصلا مؤهل إلى كاس افريقيا 2025، حيث هو منتخب البلد المنظم، سالا الاقصائيات وهو متصدر للمجموعة الثانية برصيد 18 نقطة، بعدما ربح گاع الماتشات، وماركا 19 هدف وتماركاو عليه غير 2 أهداف، وعندو احسن هجوم وأحسن دفاع، وعندو هداف الاقصائيات (في انتظار نتائج ماتشات غدا من نفس الجولة) براهيم دياز اللي ماركا الهدف الـ7 له بالهاتريك ضد ليسوتو، والمغرب هو المنتخب الوحيد اللي عندو هذه الأرقام الواعرة فالاقصائيات، وفالگروب الثاني تكلاصاو الگابون تانيين برصيد7 نقاط وتأهلو، اما ليسوتو وافريقيا الوسطى تقصاو.