گود سبور//

عبرو اللاعبين ديال المنتخب الوطني المغربي المشارك فـ كاس العرب 2025، على الفرحة ديالهم بالتأهل للدومي فينال بعدما ربحو سوريا فـ ربع النهائي اليوم الخميس بواحد لزيرو، وهداو هذا الرباح للجمهور المغربي، وأكدو ان الدومي فينال غايكون صعيب وغادي يوجدو له وما كايهمهمش ضد من غادي يلعبو الجزائر ولا الإمارات.

وهضر مروان سعدان مدافع المنتخب الوطني المغربي بعد ماتش الربع ضد سوريا، وقال: “كانبارك للشعب المغربي والماتش ديال خروج المغلوب ما كايكونش ساهل وحنا زدنا صعبناها علينا فـ 10 دقايق الأخيرة، ويمكن ما كناش مسؤولين وبحال هذا الماتشات كايبغيو تحمل المسؤولية وغادي نتعلمو من هذا الماتش، والمباراة الجايا ما نديروش نفس الأغلاط”.

ووضح سعدان: “الجمهور المغربي خاصو يعرف بلي درنا ماتش واعر وماتش كبير ولكن ما ماركيناش وبعد المرات ما كاديرش ماتش مزيان وما كاتربحش وكرة القدم تؤمن غير بلي كايربح، درنا اداء مزيان وما قدرناش نماركيو ولكن بقينا مركزين وضاغطين وقدنا نماركيو من وراها”.

وبخصوص الدومي فينال وضد من يقدر يلعب المغرب، قال مروان سعدان: “الجزائر والإمارات كانتمنى لهم التوفيق بجوج، اول حاجة كانشوف حنا ريوسنا عاد الآخرين”.

أما وليد أزارو اللي ماركا هدف الرباح للمنتخب الوطني المغاربي على سوريا، فهضر وقال فـ تصريح له: “اول حاجة كانشكر اللاعبين كاملين على المجهود اللي قدمو ماشي ساهل كل ثلاثة أيام ماتش، وكانحاولو نعطيو المجهود ديالنا كاملنا وكانشكرهم على المجهود ديالهم، وحنا عائلة واحدة وكل واحد كايعاون لاخر، كانشكر الجماهير المغربية اللي كل مرة كايجيو يشجعونا بعدد كبير وكانهديو لهم هذا الرباح”.

وكمل أزارو وقال: “دابا غادي نساو هذا الماتش ونفكرو فـ الدومي فينال، وكل مباراة كاتكون صعيبة وعندها الحسابات ديالها، دور المجموعات كان صعيب وربع النهائي حتى هو والدومي فينال حتى هو غادي يكون صعيب”.