كود -سبور //

وقعات واحد اللقطة هربانة فماتش ديال كورة القدم فدوري أمم الكونكاكاف، بطلها واحد المهاجم سميتو إيدان سكيبيو، عندو 36 عام ولي باقي كيلعب مع منتخب أنغويلا.

https://x.com/besoccer_ES/status/2104914037490283003/video/1?s=46

هاد خينا معروف بلي عندو أطول شعر فالتاريخ ديال الكورة، حيث مربي ضفاير “الدريدلوكس” فايتة متر ونص، وحيت كتجيه طويلة فالماتشات، كيضطر يجمعها ويلويها !

الماتش كان غادي عادي وأنتيغوا وباربودا رابحين بـ 5 لزيرو، فالدقيقة 69 دخل سكيبيو بديل، وما دازت حتى (3 دقائق) حتى المدافع ديال الخصم، جر سكيبيو من شعرو، الحكم معطلوش وجبد ليه الحمرا نيشان.

التسطية ديال بصح هي فاش وصلات الدقيقة 93، لعاب آخر من نفس الفرقة نسى راسو وطاح فنفس القالب، ومشى عاوتاني جر سكيبيو من ضفايرو حتى طيحو للارض، الحكم خرج ليه الحمراء وطردو.

الماتش سالا بخمسة لزيرو، ولكن العالم كامل دابا كيهضر غير على سكيبيو وشعرو الأسطوري اللي قدر يصيد به جوج لعابة ويصيفطهم لفيستيير  فقل من 20 دقيقة.