محمد سقراط-كود///

فاش فتح مطعم الزوجة التانية بفاس لقى انتشار كبير في المواقع الإجتماعية حيت السمية دارت ليبه أحسن إشهار، ال
إسم نتاشر بزاف في مواقع التواصل والناس بدات كتصور فيه وتصور حداه، الإسم بوحدو كان حدث واخا المطعم ماجاب حتى شي جديد راه غير شواية والطواجن والطنجية وكاين مطاعم بحالو في فاس وفين ما مشيتي في المغرب، ولكن الإسم خلاه مطعم متميز ومثيبر للفضول والإهتمام، كتلقى الناس دايزين حداه بالطوموبيل وجابدين البورطابلات وكيصورو البلاكة ديال الإسم، ومن بعد زارهم بنكيران وصورو ليه فيديو تما، الصراحة بنكيران يصلاح فلوكر التواصل ديالو مع الناس والسفريات لي كيدير ومايتخللها من دعابات وقفشات والله حتى واعر يدير ليهم ميسة، خصوصا الى بدا يخرج لآسيا وأمريكا اللاتينية واه.

هاد المطعم ديال الزوجة التانية فاش كتدوز من حداه كتلقى أن المطعم أصلا تقريبا كامل شي 80 في المية منو مبنية برا المحلات الأصلية، خونا هارف على واحد المساحة كبيرة قبالت المحال فيها داير داك المطعم، وداك المساحة أصلا مديورة على شكل منطقة خضراء لسكان الإقامة لي تحتها المطعم، ولكن هو جا كحش داك القنت كامل وبناه بالخشب وقادوا وفتح المطعم وتشهر والأمور تيسرات وبدات الخدمة غادا مزيان ومخدم معاه الناس وطبعا روج القنت وظهر مول الجيلي قبالتو، حتى صبح عليه القايد والمخازنية باغين يريبوا ليه هاد اليوماين، وإبتدأت مأساة العمال حسب ما يقول واحد من المستخدمين.

هو مخالف القانون السيد باني أغلب المطعم خارج المساحة ديال الحوانت، الموشكيل هو هادشي ماشي إستثنائي في المغرب أغلب القهاوي المشهورين راهم عبارة هارفين على أغلبية الطريق لي قبالتهم وهارفين على ممر الراجلين كاين لي واخدينو كامل، القهاوي أغلبهم هادي هي خدمتهم، ومع ذلك كيبقى تطبيق القانون مبني على المزاجية ديال القايد والوالي والعامل وعلى مكانة مول القهوة أو المطعم، السيد باني أغلب المطعم برا وتشييد بناء بداك الحكم كياخد الوقت، هاد وزارة الداخلية ماشافتوش نهار حط أول بوطو ونهار كمل وفتاتح المحال ودار ليه إشهار وجا ليه بنكيران، حتى دازت مدة عاد عاقوا بلي هارف على الطريق وجردة، فين كان المخزن النهار اللول فاش خرج أول بوطو، وللأسف هادي هي التدخلات ديال الداخلية من ديما، كتلقى حومة كتبنى كلها عشوائي بحال أغلب أحياء طنجة مثلا السيد مطلع ربعة ديال الطبقات حفر الساس وطلع السواري ولاح الضالة اللولة والتانية والتالتة والرابعة ولبس وقاد البيبان والشراجم، عاد كيتم جاي القايد والسلطة بالطراكس يريبو ليه حكا راه الأرض فيها نزاع أو غير قانونية، هادشي كان مقبول في التمانينات والتسعينات دابا راه البورطابلات والأقمار الصناعية وعدة وسائل باش تقدر السلطة تظبط الخروقات، في فرنسا بإستعمال كوكل إيرث قدرو يلقاو الناس لي عندهم مسابح في الفيلات وناكرين مكيخلصوش عليهم ضريبة ودخلات الدولة ملايين الأوروات، حنا باقين خدامين بالسيستيم القديم كتبني في عهد القايد او القايدة القدام وفاش كيجي قايد جديد كيبين فيك السربيس ويطبق القانون على أساس القانون مكانش فاش البني كان خدام بان حتى سالى.