كود احمد الطيب الرباط ///

حفل تنظيم قرعة كأس افريقيا للامم المغرب 2025 حتاضنها مسرح محمد الخامس بالرباط البارح 27 يناير 2025 داز مزيان على العموم. 

التنظيم كان مقاد مهني. حفل على العموم خفيف ضريف. بدا بالموسيقى وسالى بالكورة. ملون ومريح٬ على العموم٬ للعين. الشركة المنظمة دارت خدمة نقية واخا الفضاء ما عاونهمش. مسرح محمد الخامس مسخسخ وخاصو يتعاود كولو. قدام بزاف. هادي مسؤولية وزارة الثقافة ووزيرها مهدي بنسعيد اللي عزيز عليه يتبندر.

من الامور الايجابية البارح كذلك وكانت مفاجأة زوينة وهو دجيمون هونسو٬ الممثل الامريكي اللي تزاد فكوتونو بالبينين اللي قدم الحفل مع المغربية نبيلة الكيلاني. ممثل عالمي تفتاخر بيه افريقيا قدم فقرات حفل الافتتاح وكان مزيان.

من الامور الزوينة فحفل البارح كانت كلمة رئيس الجامعة الملكية المغربية لكرة القدم. مرافعة ذكية كلها سياسة بلا ما يقول فيها حتى كلمة فالسياسة بشكل مباشر. 

هدر على اش كتعني افريقيا عند المغرب المفتخر بافريقيتو. ربطنا التاريخ والحاضر عن طريقة التجارة والحضارة والفكر والعلم والفن. تنظيم كأس افريقيا كيف قال٬ “فرصة لتجديد التزام المملكة المغربية، تحت القيادة الرشيدة لصاحب الجلالة الملك محمد السادس، مع الأشقاء الأفارقة على المضي قدما نحو مستقبل مشترك في المجال الرياضي والتنموي” وهاد “الكان 2025” ماشي “نتيجة إرادة طارئة بل هو استمرار طبيعي لتاريخ طويل من الانتماء المشترك لإفريقيا” باش نصعنو “تراث مشترك وهويات متداخلة وكتابة صفحات من التآزر والتعاون في أيام الشدة، لاسيما أيام الكفاح من أجل الحرية والاستقلال”.

ركز باللي الرهان فهاد كأس افريقيا خاصو ينصب على “الانتصار للنظرة للحياة ملؤها التفاؤل والتأخي والتنافس البناء الذي لا يتناقض مع الاحترام والتعاون المتبادل” وباللي المغرب هنا كيدافع “قيم السمو الإنساني التي نسعى إلى تكريسها  لدى شبابنا وطفالنا، قيم كرة القدم التي تذكرنا دائما ان العالم ليس في حاجة للاستضامات في فضاءات الصراع بل في حاجة إلى منافسات على أرضيات تنتج الفرح والسعادة، أرضيات العشب الاخضر، وأجدد لكم مرة اخرى شكري وترحيبي وسنستمر جميعا في بناء الحلم “. رسالة مبطنة او واضحة للجزائر بلا ما يذكر اسمها. دولة الجينرالات كلشي عندهم حروب وصراعات. كاليهم راه هادي غير رياضة باش الشعوب تولي اخوة ماشي باش تضارب

طبعا حضور نجوم لعملية القرعة عطى لهاد الحفل قيمة اخرى زوينة. لعابة من الكوت ديفوار ونيجيريا والسينغال والمغرب. اجيال مختالفة جمعهم عشق الكورة. 

فنيا كان لبلاطو مابيهش. اللي دار بيرفورمونس مزيانة هو ميتر گيمس. محترف. فوقت قصير قدر يقدم عرض زوين. 

طبعا ماشي كاع اللي حضرو قدرو يقدمو خدمة مزيانة. من المفاجئات غير السعيدة هو اقحام نعمان لحلو فالحفل فاخر دقيقة. قبل٬ تم الاعلان غير على حاتم عمور وميتر كيمس وريدوان٬ كيفاجأ الحضور بلحلو كيغني اغنية على سيدنا. يا ودي سيدنا باش وصل للحكم طلب ما يغني عليه حد. راه رئيس الدولة محتاج للي يدير خدمة يديرها باحترافية ويبدع فيها. فاي مجال كان. 

هاديك الاغنية ماشي بلاصتها حفل البارح٬ وحتى ايلى بغى يديرها لحلو وينتجها بفلوسو وما ياخد حتى درهم من المال العام. 
مزيان يجبد سيدنا ويشكرو مونتسيبي رئيس الكاف والممثل الامريكي البينيني ديجمون هونسو ويشكرو ميتر گيمس لكن فين ما طلع مغربي يجبدو بلاش. ما محتاجش. خليو للخراين يشكرونا عافاكم

حتى ريدوان باش دور بيه شي ممثلين وممثلات وشي وحدين ما عرفناش اشناهي المهنة ديالهم٬ كانت تخربيقة. طلعو مبهدلين للخشبة بتوني ماموحدش. شكون هاد الغبي اللي جاب هاد الفكرة المتخلفة ديال تجيب فنانين مغاربة يطلعو مع “ريدوان” وكيفاش واحد برو بحال هاد المنتج ما عتارضش. 

هاداك حاتم عمور من الاحسن ما يهدرش عليه. 

من الامور المثيرة البارح دارها وزير الثقافة والاتصال والشباب المهدي بنسعيد. ما عمر شي وزير فالحكومة ويمكن حتى اللي سبقها من الحكومات بما فيها وزراء الداخلية٬ ما جا لمسرح ومعاه لاصقين فيه 4 دياولو. واحد اسمو صلاح الدين عبقاري تكوينو ضعيف ومستواه اقل من العادي وخبرتو منعدمة وعطاه اخيرا منصب كاتب عام بالنيابة فوزارة الثقافة وخلى ليه مديرتي “الشؤون الإدارية والمالية” اللي كانت عندو من شتنبر 2023. كان معاه عبد الله عيد اللي كان مستشار عندو وسب البوليس وحيدو ولكن مكلف ليه بالصفحات. تخصصو تمجيد هاد لوزير. وكان يوسف بريطل مستشار اخر ليه. مخرج ضعيف وممثل متوسط وعندو يد فهاديك المهزلة ديال شي ممثلين يكونو مع “ريدوان” وطبعا كان مستشارو فالتواصل وديع تاويل. 
تصورو هادو طلعو فين كانت اللجنة التنفيذية للكاف الفوق. طلع بنسعيد واخا ممنوع على كلشي وطلع معاه مستشاريه منهم هاداك عيد. 

دابا لا فوزي لقجع لا مونتسيبي لا وهبي وزير العدل اللي حضر للحفل ما كان معاهم شي حد.

هادا وزير ما قدم للثقافة والو وجايب جيش. ياكما هادوك الاغبياء ديال المؤثرين والمؤثرات اللي حضرو البارح غادي يجيشهم لدعم حزبو فانتخابات 2026 التشريعية. معاه كلشي متوقع