كود سبور//

عين الرئيس الجديد لمولودية وجدة المدني الزياني، اللي تنتخب بريزيدون جديد للنادي فالجمع العام الأخير، أعضاء المكتب المديري ديالو، وهما 9 ديال الأعضاء إلى جانب المنصب ديالو هو كرئيس.

وكون المدني الزياني المكتب المديري الجديد لمولودية وجدة من محمد قايدي كنائب أول للرئيس، ورحال الكناني كنائب ثاني للرئيس، كمال حناش ككاتب عام، ونائب الكاتب العام هو رشيد بنعامر.

وتعين كمال التوفية أمين مال فالمكتب المديري ديال مولودية وجدة، وعبد الرحيم رحماني نائب له، ومحمد لكناني مستشار هو عبد الرحيم كبير، وغيكون الحسن مرزاق مستشار وناطق رسمي للنادي.

ومن المنتظر يتعقد اجتماع اول للمكتب المديري الجديد لمولودية وجدة برئاسة المدني الزياني هذه السيمانة، وفيه غيتم تعيين اللجان وملي بسالي يعلنو عليها، مع العلم ان الوجديين معولين على الرئيس الجديد والمكتب ديالو يخرجو المولودية من الوضع الصعيب اللي كتعيش فيه مدة هادي.