كود الرباط//

عدد من الموظفين صبحو غاضبين اليوم الاثنين 29 يوليوز الجاري، حيث متوصلوش بالزيادة فالصالير كيف وعدتهم الحكومة أي 500 درهم ابتداء فاتح يوليوز.

كولشي كيتسنا الزيادة فآواخر شهر يوليوز، ولكن مكانتش، والسبب حسب مصدر نقابي هضر مع “كود” تأخر في إخراج المراسيم ديال هاد الزيادة فالجريدة الرسمية.

وأكد ذات المصدر النقابي لـ”كود” بلي هادشي عادي نظرا للخدمة الكبيرة لي كادير الإدارة باش تخرج هاد المراسيم وتفعل الاتفاق الاجتماعي، موضحا بلي غالبا فالأيام المقبلة غايتم إصدار المراسيم.

وأشار المصدر النقابي بلي حتى فقطاع التعليم كان الاتفاق يتوصلو فبداية يناير 2024 ومتوصلوش حتى للشهر الرابع من السنة وخداو الرابيل.

يشار بأن الاتفاق الاجتماعي الموقع بين الحكومة والنقابات الأكثر تمثيلية، والكونفدرالية المغربية للفلاحة والتنمية القروية والاتحاد العام لمقاولات المغرب، أقر زيادة عامة في أجور موظفي الإدارات العمومية والجماعات الترابية والمؤسسات العمومية الذين لم يستفيدوا بعد من مراجعة أجورهم، بمبلغ شهري صاف قدره 1000 درهم يصرف على قسطيْن.

الزيادة الخاصة بالقطاع العام موزعة على قسطين متساويين؛ الأول ابتداء من فاتح يوليوز 2024، والثاني ابتداء من فاتح يوليوز 2025.