كود سبور//

بارك نور الدين الزياتي مدرب شباب المحمدية للرجاء الرياضي التأهل إلى ربع نهائي كأس العرش، وأكد أن اللعب بين الفريقين كان فالمستوى، وبلي الشباب كانوا لاعبين ضد فريق متمرس ولاعب على البطولة، ودارو ماتش مزيان وحاولو يحافظو على الشبكة ديالهم ولكن وبسبب قلة التجربة دارو خطأ وتماركا علينا الهدف.

وهضر الزياتي بعد خسارة شباب المحمدية مع الرجاء الرياضي بواحد لزيرو فثمن نهائي كاس العرش وقال: “الرجاء كانو متحكمين فالكورة وإذا خرجتي تلعب معهم غادي تخلص وكنفتخر باللاعبين ديالي على الماتش اللي دارو، واخا الظروف والأحوال اللي كنعيشو وبرافو عليهم”.

ووضح مدرب شباب المحمدية: “الماتش ضد الرجاء فكاس العرش هو درس لنا قبل ما نلعبو معهم فالبطولة السيمانة الجاية، باش نعرفو الخلل ديالنا ونقاط القوة ديال الرجاء ونوجدو لهم”.

وأكد نور الدين الزياتي: “كاين فرق ديال اللاعبين بينا وبين الرجاء، وحنا كنلعبو على حساب الإمكانيات ديالنا، وعندنا لاعبين شباب اللي ما عندهمش تجربة وواخا هاكاك لعبو الند للند ضد الرجاء وراه فرق كبير بين القيمة المالية ديال لاعبين الرجا وديال المحمدية”.