كود – عثمان الشرقي//

من بعد صيف عامر بالسهرات والحفلات والمواعيد الفنية، (مونية التازية 1) ولات من الأسماء المعروفة فالساحة الفنية الشعبية ،صدمات الجماهير مني علنات اعتزالها على الميادين الفنية بعد تجربة فنية كبيرة مع الفنان عبد العزيز أحوزار.

وحسب ما كيدور فالكواليس، فـ“مونية الروسية” قررات تحبس النشاط الفني ديالها وتسالي الشراكة الفنية اللي كانت كتجمعها بالفنان عبد العزيز أحوزار، بعد ما ساهمات معه برفع مداخيل لغرامة وانعاش خزينة الفريق.

مونية كانت حاضرة بقوة فالموسم الصيفي، وشاركات فعدد من السهرات والحفلات، وفرضات حضورها وسط الجمهور بأسلوبها وأدائها، الشي اللي خلاها تكون من الأسماء اللي كيتسناوها المتابعين فالسهرات.

مونية ماشي غير شيخة حيث عندها علاقة مباشرة مع عالم الموضة والجمال، مني كتشارك فالترويج والإشهار لعدد من المحلات والمنتوجات المرتبطة بالماكياج ومواد التجميل، وهو جانب آخر من النشاط ديالها اللي خلاها تحافظ على حضورها فالسوشيال ميديا.

أما على الأسباب اللي ممكن تكون ورا قرار الاعتزال، فمزال ما كاين حتى توضيح رسمي من مونية الروسية، غير هو بعض المصادر اكدات لكود أن هاد القرار مرتبط بإمكانية دخولها مرحلة جديدة فحياتها الشخصية مني جاوها بعض العروض للزواج.

المتابعين كيسولو واش بصح مونية روسية غادي تفرط فالنجومية والفلوس والشهرة وتفضل القفص الذهبي أو أنها مغاديش تبعد بزاف كيف ما سبق لعديد من الفنانات تراجعو على الاعتزال واخرهم كان الطبية هدى.