كود -سبتة//

بينات تحقيقات دارتها عناصر الحرس المدني الإسباني فمدينة سبتة على ريزو كيستغل “الزواج الشكلي” اللي كيتنظم مقابل الفلوس، باش يعاونو مهاجرين يريگلو الوضعية القانونية ديالهم فإسبانيا.

وبحسب التحقيق السلطات كتشك فشبكة كتنظم تهريب المهاجرين لسبتة، وكتسهّل حتى إجراءات اللجوء والزواجات الوهمية.

التحقيقات، اللي اعتمدات على مراقبة ميدانية وتسجيلات، بينات أن بعض المهاجرين كيخلصو فلوس كبيرة باش يدبرو ليهم زواج بيض، الهدف منو هو ياخدو بطاقة الإقامة الإسبانية.

ومن بين المعطيات اللي جات فملف القضية، كاين واحد المواطن من تطوان قال للمحققين بلي خلص 12 ألف يورو لوسيط، اللي عرفو على مرا من سبتة، باش يديرو عقد زواج ويكمّلو جميع الإجراءات القانونية قدّام الإدارات المختصة.

وكشفات الأبحاث أن هاد السيد تعرّف على الوسيط ملي كان خدام فكاراج لإصلاح السيارات فتطوان، ومن بعد تريكلات ليه مقابلة مع المرأة اللي غادي تولّي “مرتو ” فلوراق، حسب ما جا فمحاضر التحقيق.

هاد المعطيات كاملين جاو فتحقيق كيتعلق بشبكات تهريب المهاجرين المرتبطة بالحدود البحرية ديال سبتة، واللي كشف أن أنشطة غير قانونية كتكون عمليات الهجرة السرية.