كود سبور//

تعادل المغرب الفاسي مع المضيف ديالو نهضة الزمامرة اليوم الاثنين فتيران أحمد شكري فالزمامرة، ضمن منافسات الدورة 4 من البطولة الاحترافية لكرة القدم.

وسالا الماتش بين المغرب الفاسي ونهضة الزمامرة بنتيجة التعادل الإيجابي واحد لواحد، وماركاو الزمامرة الاولين بواسطة أيمن موطاوي فالدقيقة 36، وجابو المغرب الفاسي التعادل بواسطة مصطفى السهد فالدقيقة 51.

الماتش بين الماص والزمامرة عرف توقفات وحالات تحكمية واحتجاجات كثيرة، والحكام والفار حيدو هدف للمغرب الفاسي وحيدو هدف للزمامرة بداعي التسلل، أما جماهير الماص فكيف العادة ولاو ديما هازين فالتيران لافتة “الجامعي إرحل”، باش زعما رئيس الفريق إسماعيل الجامعي يمشي بحالو حيث ما راضينش على الطريقة باش كيسير النادي.

المغرب الفاسي وبعد هذا التعادل خداو نقطة واحدة رفعو بها رصيدهم إلى 6 نقاط وطلعو للمركز السادس، أما نهضة الزمامرة ولات عندهم 4 النقاط وكيحتلو المركز 11