كود سبور- القاهرة//

خرجو نهضة بركان خاسرين الشوط الأول من روتور فينال كأس الكونفدرالية الإفريقية مع الزمالك المصري، اللي بادي دابا من اليوم الاحد فالعاصمة المصرية القاهرة.

وسالا الشوط الأول من فينال نهضة بركان والزمالك المصري اللي ملعوب فتيران القاهرة الدولي بحضور كثر من 70 ألف متفرج أعلبهم من جمهور الزمالك، مع تواجد مجموعة من المشجعين البركانيين (سالا) بواحد لزيرو لمصلحة الفريق المصري.

وقدرو الزمالك المصري يوصلو للشبكة ديال نهضة بركان، بعد ضغط كبير داروه اللاعبين المصريين على الفريق البركاني، وماركاو فالدقيقة 23 الهدف الأول بواسطة لاعبهم زيزو اللي ضرب الكورة وصيفطا للشبكة البركانية، ومن وراها حاولو نهضة بركان يرجعو فنتيجة الماتش برأسية ديال يوسوف دايو وشي كواري آخرين ولكن ما قدروش، وسالا الشوط الأول بتقدم الزمالك بواحد لزيرو.

ومطالب التونسي معين الشعباني مدرب نهضة بركان، باش يبدل التكتيك ديالو فالشوط الثاني ويدير تغييرات يقلب بها الماتش، اللي غادي دابا فمصلحة الزمالك المصري حيث هاد النتيجة مع نتيجة 2 لواحد ديال ماتش لالي، كتعطي الكأس للفريق المصري.