كود سبور//

باغي الدولي المغربي عبد الصمد الزلزولي يطور الكاريير ديالو، ويجيب عرض يخليه يمشي لفريق كبير من ريال بيتيس الاسباني اللي كايلعب فيه دابا، وباش يحقق هذا الشي قرر يدير خطوة مهمة قبل الميركاتو الصيفي الجاي.

وحسب جريدة “سبورت” الإسبانية، قرر عبد الصمد الزلزولي يبدل وكيل الأعمال ديالو خافي گاريدو ويتفارق معه في انتظار الإعلان الرسمي على هذا الشي بما اتافقو بجوج على الفراق، وباغي يكلف شركة Footfeel ISM ديال وكيل أعمال اللاعبين اليخاندرو كامانو، وهذا الشي باشي يقلب على آفاق جديدة فالمسار الاحترافي ديالو فسوق الانتقالات.

اما ريال بيتيس وحسب نفس المصدر، فما عندهمش مشكل يطلقو عبد الصمد الزلزولي ويسهلو عليه الانتقال لفريق آخر، غير بشرط يجيهم عرض ما كاينزلش على 25 مليون اورو مقابل التنازل على الخدمات ديالو، وهذا المبلغ ما غاديش يكون عائق قدام الاندية اللي باغيين يسنيو مع لاعب بالإمكانيات ديالو ولد بني ملال.