كود مصطفى الشاذلي ////

واش عبد الصمد الزلزولي حسم فاختيارو باش يلعب مع الصبليون؟ حسب ما توفرت عليه “كود”. هاد الشي مازال. اللي وقع هو فالايام الاخيرة وقعات امور كثيرة. اللي رسل الرسالة اللي صيفطها نادي برشلونة للجامعة الملكية المغربية لكرة القدم باللي ما غاديش يلعب مع الاسود بعد ما وجهو ليه الدعوة هو المانادجير ديالو وخوه. علاش دارتها٬ وفق ما علمته “كود” الزلزولي خدا الجنسية الصبليونية قبل يومين. اي غير وصلاتو الجنسية وهو يرسل ديك الرسالة.

الرسالة دارها هاد المانادجر حقاش طمع فوعود باش يلعب مع المنتخب الاسباني. طبعا هاد الشي صعيب بزاف، ايلى شفنا اخر كأس اوربا للامم ما كان حتى شي لعاب من ريال مدريد نعرفو باللي باش تلقى بلاصتك مع لويس انريكي صعيبة وبزاف بزاف.

تصريحات تنسبات لتشاڤي مدرب البارصا لعبات نوع من الضغط. تشاڤي قال باللي ايلى عبد الصمد لعب كأس افريقيا غادي يفقد بلاصتو. اللعاب خاف.

وفق مصدر ل”كود” فهاد اللعاب اتصل بالجامعة حتى بعد اعلانو هاد القرار وخرج فوكالة الانباء الاسبانية “ايفي”. ووفق مصدر “كود” فللعاب ما بانش حاسم فاختيارو. مازال متردد. دابا الكورة عندو. وفق مصدر “كود” “خاصو يدير رسالة كيف اللي رسلها ايلى بدل رأيو وفكر شي نهار يلعب مع الاسود”.

فوزي لقجع رئيس الجامعة الملكية لكرة القدم قال فتصريح لراديو مارس باللي هدر مع رئيس البارصا لابورطا ومدرب النادي تشافي باش يلتاحق اللعاب ولكن هو رفض.

قرار اللعب فاللول مع الاسود كان بعد اتصالات معاه ومع رئيس ناديه ومدربو من طرف صديق للمغرب وهو احد نجوم الكرة فافريقيا. هو اللي قبل وعليه دارو وحيد فاللائحة اللي لاعبة فالكان.

تمثيل اسبانيا صعيب عليه. ممكن يوقع ليه مع وقع مع منير الحدادي اللي تحرم لسنوات من اللعب مع الاسود حقاش لعب 5 دقايق مع منتخب اسبانيا. من بعد ما بقاوش كيعيطو عليه.

طبعا مع الزلزولي الامور تقدر تكون مختلفة. هاد الشاب عندو 20 عام. صغير بزاف وكلشي يمكن يتغير فاي لحظة

يمكن بعد الكاف وبعد ما يرجع بعد اصابتو بكورونا يغير رأيو.