كود سبور- وجدة//

اكد الناخب الوطني السابق بادو الزاكي المدرب الحالي ديال النيجر، أنه عاش موقع صعيب ملي لعب ضد المغرب، يوم الجمعة 21 مارس 2026، برسم الدورة 5 من اقصائيات كاس العالم 2025، قدام الجمهور المغربي فتيران وجدة، حيث لعب ضد المغرب البلاد ديالو، وقال بلي الدموع طاحو له.

وهضر بادو الزاكي خلال الندوة الصحافية اللي كانت ورا الماتش بين المغرب والنيجر، واللي سالا بنتيجة 2 لواحد لمصلحة الأسود، وقال الزاكي: “كنت فرحان بالهدف ديال النيجر، ولكن ما يمكليش نبين الفرحة ديالي قدام الجمهور المغربي، ملي تعزف النشيد الوطني المغربي، حسيت براسي غانبكي حيث لقيت راسي لاعب ضد النشيد الوطني المغربي، بعدما كنت كاندافع على الألوان ديال بلادي من قبل، وحبست الدموع ديالي، وهذا الشي اللي عشت ضد المنتخب المغربي صعيب، كيفاش عمري كل وانا كاندافع على التوني المغربي واليوم لاعب ضدو وباغي نربحو وما نبغيها لحتى واحد”.

وكمل الزاكي: “كانت شي حاجة ايجابية فماتش اليوم بالنسبة لمنتخب النيجر فهي روح المسؤولية اللي عندي والاحترافي ديالي، المنتخب المغربي ربح يستحق الرباح بحكم الأداء والطريقة باش كايسير الماتش، وعندو لاعبين كبار يقدرو يبدلو الماتش فأي وقت، ومن ناحية اخرى اهنئ اللاعبين ديال النيجر اللي واخا ما معروفينش على الساحة الأفريقية وبينو انهم كايعافو يلعبو الكورة”.