گود سبور//

دافع الاطار المغربي بادو الزاكي المدرب الجديد لمنتخب الأردن، على المواطنين ديالو جمال السلامي اللي أهل المنتخب الأردني لاول مرة فتاريخهم للمونديال وقادهم فكاس العالم 2026، وقبل منو الحسين عموتة اللي وصل الأردنيين لاول مرة فتاريخهم لفينال كاس اسيا عام 2024، واكد ان مشاكل المنتخب الأردني فالمونديال كانت بسبب اخطاء اللاعبين.

وتوجه سؤال لبادو الزاكي على ان الجماهير الأردنية فقدت الثقة فالمدرسة المغربية، وجاوب وقال: “واش المنتخب الأردني مشى يشارك فكاس العالم 2026 باش يربح كاس العالم؟ النتائج؟ مع من لعبتي؟ لعبتي مع النمسا عندهم كثر من 5 او 6 المشاركات ولعبتي مع الجزائر ومع الأرجنتين هادو منتخبات اللي عندهم بطولات قوية أنا ما غاديش نسمي ولكن انت بالإشارة غادي تفهم، راه منتخبات خرجت خاسرة 4 و 5 واخا عندها بطولات قوية وعندها اسماء كبيرة وفارضة اسمها داخل اسيا”.

وكمل الزاكي وقال: “ملي كانشوفو المنتخب الأردني فالمجموعة ديالو فكاس العالم اللي كانت قوية بالأرجنتين والنمسا والجزائر وكايخسر بصعوبة وكايقدم اداء مميز وبأخطاء فردية يمكن يتجنبها كونا غادي نهضرو على اداء آخر، أنا كنشوف المشاركة ديال المنتخب الاردني فكاس العالم كانت جد ايجابية وغادي يكون الانعكاس الإيجابي ديالها من ورا كاس العالم بحكم اللاعبين اللي خداو التجربة والثقة وتحكو مع مدارس مختلفة”.

الأردنيين صحافيين وجماهير دارو حملة فالأول على الحسين عموتة واخا حقق معهم إنجازات تاريخية عمّرهم ما كانو يحلمو بها، ومن وراها دارو حملة على جمال السلامي اللي اهل منتخب بلادهم لكاس العالم اللي عمرهم شاركو فيه.