كود سبور//

نفى الناخب الوطني وليد الركراكي واش كاين شي ازمة بين حكيم زياش وبراهيم دياز فالمنتخب المغربي بسبب ضربة الجزاء الثانية فماتش الگابون اللي كانو باغيين يلعبوها بجوج، واكد ان الامور مزيانة والتراتبية فتنفيذ ضربة الجزاء احترمت.

وقال وليد الركراكي بعد نهاية ماتش المغرب والگابون: حكيم زياش هو الاول اللي مكلف بلعب ضربات الجزاء والثاني هو سفيان رحيمي والثالث هو براهيم دياز وهادي هي الكورة شحال من مرة كانشوفو اللاعبين كايبغيو يلعبو ضربات الجزاء وفاللخر القرار كايتحتارم وما طرا والو، طلب منو يضربها وما شفتش شي حاجة كثر من هذا الشي”.

ووضح الركراكي: “هذا الشي كيطرا فالفرق الاوروبية، وهذه مشاكل صغيرة تقدر توقع فالتيران ولكن من بعد ما كاين والو وما عندهمش مشكل يلعبو بيناتهم ولكن خاصنا نلقاو توازن دغيا والخدمة ديالي هي نالقا احسن اللاعبين باش يلعبو بيناتهم وملي غايحس شي لاعب ان الفريق ديالو ديك الساعة غادي نتدخل”.

وبخصوص اول هدف لابراهيم دياز مع المنتخب المغربي، اللي ماركاه على گابون، قال الركراكي: “ملي دار النية وماركا الهدف الاول مع المنتخب يمكن غايتحرر”.