عفراء علوي محمدي- كود//

كشف سليمان الريسوني، الصحافي المعتقل، انه وقف الإضراب ديالو على الماكلة فاليوم 122 نهار السبت، من بعد ما هزوه للسبيطار.

وقال الريسوني، على لسان دفاعو محمد المسعودي، اللي نشر حوار ليه معاه على “فيسبوك” من بعد ما زارو، (قال) انه وقف الإضراب استجابة لنداء عائلتو ودفاعو ومئات الشخصيات والهيئات الوطنية والدولية اللي طلبات منو هذشي، ومن بعد ما تلاقى مدير الحبس يوم الثلاثاء 3 غشت الحالي، اللي جا بعد زيارة وفد المجلس الوطني لحقوق الانسان، واللي كان فيه البروفيسور رشيد بوطيب اللي اتفق مع مدير الحبس باش يتهز لابن رشد نهار الأربعاء نظرا لوضعو المتدهور.

وبقى الريسوني مضرب على الطعام حتى لنهار السبت 7 غشت الحالي، فاش هزوه للسبيطار، لي دوز فيه نهار كلو بمصاحبة طبيب السجن الدكتور السامي والطبيب المركزي بالمندوبية والدكتور توفيق أبطال ومدير السجن.

وقال الريسوني أن الدكتور السالمي الطبيب الرئيسي لسجن عكاشة وضح ليه بالتفاصيل خطورة وضعو الصحي بعد هذ المدة ديال الإضراب اللي وصفو ب”المدمر”، وفاش سولو علاش كيقول هذ الهضرة فالوقت اللي رؤساؤو كيشككو فمصداقية هذ الإض راب، قال أنه أو اللي كيهمو هو ينقل الوضع ديالو الصحي اللي اعتبرو كيتدهور يوم بعد يوم، وينقل هذشي فتقرير للمندوبية.

وكشف الريسوني انه خضع لفحوصات طبية، وكاينة توصيات طبية بمتابعة العلاج لدى أخصائي القلب والشرايين لمراقبة ارتفاع ضغط الدم، وكذا متابعة العلاج لدى أخصائي الاعصاب لتحديد المشكل اللي كيعاني منو فرجلو ليسرية، وقال انه تحددات ليه مواعيد باش يرجع للسبيطار.

وقال الريسوني للمسعودي انه كان كيشوف انه مايقدش يكمل حتى سيمانة ديال الإضراب عن الطعام، وكان سبق قال هذشي لعمر الراضي، لكن من بعد فاش دار قرار بخوض الإضراب المفتوحد استطع يتقدم فيه مدفوعا بإحساسو الكبير بالظلم والتعسف، وماكان عندو غير جسدو وروحو باش يعبر على حجم الضرر اللي طالو هو وعائلتو وجريدتو.

وعبر الصحافي المعتقل على تفاجؤو بتضامن آلاف الأشخاص والمنظمات معاه، وشكر كاع اللي وقفو معاه.

وكان خدا الريسوني 5 سنين ديال الحبس و10 مليون تعويض، بعد إدانتو بتهم هتك العرض بالعنف والاحتجاز فحق شاب.

https://m.facebook.com/story.php?story_fbid=4209442462502944&id=100003116952019