سامي العلوي-كود كازا //

آشنو علاقة “الحاج “، بطل ضوسي التخلويض لي كيضرب كريديات بالمليار بوراق مزورة من الابناك و ريزو ديال السطو على عقارات الاجانب لي الزعيم ديالو سميتو “حيم ” لي كتين فسجن عكاشة؟ و حجم الملايير التي حصلت عليها شبكات النصب على الابناك المغربية لتمويل مشاريع وهمية بضمانات عبارة عن أراضي وثائقها مزورة.

في هذا السياق حصلات “كود ” عن معطيات حصرية عن شبكة “الحاج” التي سبق لإحدى الجمعيات بجهة الدار البيضاء سطات أن راسلت رئاسة النيابة العامة والوكيل العام بخصوصها؛ تقدمت بملفين الأول أمام البنك العقاري والسياحي لتمويل مشروع نواحي احد السوالم والثاني أمام البنك المغربي للتجارة والصناعة لتمويل مشرع بالحي الصناعي زناتة.

“كود” توصلت بأن العقار اللي غادي يتقام فيه المشروع الوهمي اللي ترخص فيه البناء سنة 2019 من طرف المجلس البلدي للمحمدية تحت عدد 53/2019 بتاريخ 03/06/2019 مساحته حوالي 6000 متر مربع؛ هو في ملكية 3 ديال الأشخاص؛ زوج منهم كايدوزو الحبس في ملف شبكة تزوير أراضي الأجانب ولي عندها ارتباط بشبكة السطو على العقارات الاجنبية يتزعمها ح. ومن معه؛ اللي كان تورط في ملفات تزوير وثائق رسمية ديال عقارات كثيرة منها ملف جورج بريسو وعقار شاموريل وعمارات روماندي اللي وسط المعاريف.

“كود” بحثات على العلاقة اللي كاتربط هاد” الحاج “بزعيم شبكة السطو على عقارات الغير؛ ووجدات انهم كانو بزوج فسجن عكاشة لمدة طويلة ولقات أيضا أنهم شركاء في شركات عديدة إلى جانب شركاء آخرين كانت مفتوحة عليهم أبحاث من طرف الفرقة الوطنية للشرطة القضائية بالروداني بشبهة الانتماء إلى شبكة “حيم “.

المعطيات كاتشير إلى أن هاد البقعة الأرضية تم رهنها للبنك واخا ماساوية والو؛ حيث وراقيها “مدرحين”؛ وأفراد الشبكة كايتبادلو الأدوار بيناتهم.

“كود “توصلت لاخبار كاتفيد أن هاد الشبكة كاتخدم بشركات عديدة فيها وليدات صغار باقيين يالله بداو فالحياة وكايستغلوهم كواجهات لتبييض الأموال المتحصلة من الجنايات؛ وماشي غير هادشي فقط بل كايتم استثمار أموال كثيرة في شركات التسويق الهرمي وكايبيعو الوهم للناس…

المعطيات اللي عند “كود ” كاتشير لان الوكيل العام بمحكمة كومناف الجديد عطا تعليمات جديدة وصارمة يوم الجمعة المنصرم للفرقة الوطنية للشرطة القضائية باش يكملو الابحاث اللي تفتحات في الشكاية عدد 199/3115/2021.