كود سبور//

خلق لاعب التنس الكولمبي نيكولاس ميكيلا جدل كبير ملي ربح البارح الاحد اللاعب المغربي رضا بناني بالدار البيضاء، ضمن منافسات كاس ديفيس المؤهلة للمجموعة الأولى، واتضح مزيان أن الرياضيين المغاربة خاصهم تكوين وتأطير فتدبير الموقف الاستثنائي والأزمات خلال المباريات، بحال كيفما وقع ففينال كأس إفريقيا اللي خسر فيه المنتخب المغربي النهائي مع السنغال حيث الناخب الوطني وليد الركراكي واللاعبين المغاربة فيهم لفضول ومشاو كايطلبو بغباء السنغاليين يرجعو من الانسحاب ويكملو معهم الماتش.

البارح ملي سالا هاذ اللاعب الكولومبي وربح الخصم ديالو المغربي رضا بناني، ناض كايستفز الجمهور وكايقولهم بيديه على فمو سكتو راني سكتكم، حيث زعما كانوا ضاغطين عليه وسط الماتش وكايبرزطوه فالإرسال، المهم هاذ الكولومبي بدا كاينقز فالتيران فرحان بالرباح، ولكن المشكل هو أن الصطاف المغربي واللاعبين المغاربة مشاو معه فالخط وتناقشو معه ولحسن الحظ سالات الأمور مزيان، بعد تدخل الحكام والمنظمين د الماتش، غير هو راه هاد الحادث حرك أقلام الإعلام الدولي واللي فيهم وسائل إعلام كاتخدم أجندات ضد المغرب، وباغيين غير الفرصة فين يشوهو صورة البلاد حيث ما مصروطش لهم المستوى العالمي اللي وصلات له المملكة فتنظيم البطولات الدولية، وخايفين من منافستها.

جريدة AS الإسبانية، اللي كاتحاول تدافع على بلادها باش تنظم فينال كاس العالم 2030، اللي منافس عليه المغرب وإسبانيا، استغلت الواقعة ديال لاعب التنس الكولومبي والاستفزاز ديالو للجمهور المغربي واللاعبين المغاربة والصطاف ديالهم، وكذبت وقالت بلي نيكولاس ميكيلا احتفل بشكل استعراضي كرد فعل على ما تعرض له فالماتش، وأن الفريق المغربي ما رضاش ناض له وتشادو الفريقين المغربي والكولومبي وكانو القراعي كايتشايرو على التيران وأن الجمهور حاول يهبط لارض الملعب ويقتحمها شحال من مرة، وأن السلطات خرجت الفريق الكولومبي ومشات معهم حتى لمقر إقامتهم خوفا عليه، المهم الجريدة الإسبانية نفخت بزاف فهاد الشي وكبراتو بالإشاعات، مع العلم أن الحادث راه سالا فالتيران.

بحال هذا المواقف راه الرياضيين المغاربة خاصهم يوليو يعرفو يتعاملو معها، وتكون عدنهم الرزانة والخبرة فتدبيرها، وهذا راه كايبين بلي خاص ضروري تكوينهم فتدبير الأزمات، حيث ولاو كايعطيو لأعداء المغرب فرصة من والو فين يشدو فينا ويحاولو خدش صورة البلاد، حيث موقف بحال ديال البارح ما كانش خاص اللاعبين المغاربة والصطاف يهضرو مع اللاعب الكولومبي، ولكن كانو يعمرو عند الحكم بلي استفزّ الجمهور واستفزهم هما كمنافس، ويتبعو الموضوع مؤسساتيا، بلاما يعطيو للبراني فرصة فين يشد، خصوصا وأن أعداء المغرب غير كايتسناو مع الدورة.