كود سبور – كازا///

خرجت قناة الرياضية المغربية كاتحاول تخفف من هول الطيحة الخايبة اللي طاحت فيها، ملي دوزت إشهار ديال شركة القمر الروسية (XBET1) على الشاشة ديالها بالتزامن مع ماتشات كأس إفريقيا د العيالات “المغرب 2024″، لي بداو، البارح السبت.

وداز فالإشهار خريطة المغرب مقسومة، وهو خطأ جسيم كاتحاول القناة دابا التنصل منو بأي طريقة واخا هي المسؤولة عن كل ما يبث على شاشتها.

وخرجت قناة الرياضية قبل لحظات ببلاغ توضحي حاولت تتهرب فيه من المسؤولية.

وكالت فيه “الوصلة المعنية هي جزء من الإشارة الدولية الرسمية التي تبثها الكونفدرالية الإفريقية لكرة القدم ضمن التغطية المباشرة لمباريات كأس أمم أفريقيا سيدات، وزادت موضحة “الرياضية لا تتدخل إطلاقا في محتوى هذه الإشارة المباشرة باعتبارها مجرد ناقل للبث كما توفره الجهة المنظمة لكل المحطات التي تبث الحدث”.

وأضافت القناة “فور رصد هذا الخطأ، قدمت الكونفدرالية الإفريقية لكرة القدم اعتذارا رسميا للشركة الوطنية للإذاعة والتلفزة معترفة بمسؤوليتها الكاملة عن هذا الحادث المؤسف، كما تعهدت بتصحيح الوصلة الإشهارية المعنية وضمان عدم تكرار مثل هذه الأخطاء مستقبلا”.

“الرياضية” بهاد التوضيح راه غير زادت ورطت إدارتها، وبينات أنها ضعيفة بزاف، وانها گاعما مسوقة لكل ما يبث على الشاشة ديالها.

واش كاينة شي قناة رسمية كاتدوز شي حاجة ضد الوحدة الترابية للبلاد، والمملكة المغربية ملكا وشعبا سنوات وعقود هادي وهما يد واحدة دفاعا عن كل شبر من الأراضي المغربية، وتجي قناة رسمية تعطي كاطو لأعداء المغرب اللي موقفهم غالط وتروج خريطة المملكة مقسومة.

راه إدارة الرياضية خاصها تحشم على عرضها هي والمسؤولين ديالها ويخرجو باعتذار للمغاربة كاملين على هذا الخطأ الجسيم، والمسؤول بالقناة بالضبط اللي ورا هاد الكارثة خاصو يتحاسب ويقدم استقالتو، حيث هادي قناة رسمية ديال البلاد وماشي لعب الدراري.

وبالإضافة لهادشي، راه هذا الإشهار أصلا ديال القمر، وهاد شركة (XBET1) هي شركة ممنوعة فالمغرب. والمملكة ضدها، والحكومة كاتحاربها وراها فوزي لقجع، الوزير المنتدب المكلف بالميزانية، سبق له وأعلن على أنها شركة ماشي قانونية.

والمعروف على أن هاد الشركة ديال القمر تشكل خطرا كبيرا على المراهقين والقاصرين. وقناة بحال “الرياضية” خاصها تحمي النشأ وولاد المغاربة، وخاصها تكون أول من يحارب هاد الأنشطة ديال القمر، فبلاصة ما تدخل القمر حتى لديور المغاربة.