وكالات//

نتاشر الرعب فجامعة “ساوث كارولينا” اللي كاينة فمدينة كولومبيا، عاصمة ولاية “كارولينا الجنوبية”، من بعد ما خرجات أخبار على هجوم مسلح.

الإعلام الميريكاني قال بلي كانو أخبار كاتروج على واحد المهاجم كيتحرك حدا خزانة الجامعة، وكيضرب بالقرطاس على أي واحد كيشوفو قدّامو من الطلبة.

هادشي خلا الجامعة تعيش واحد الحالة ديال الفوضى والخوف، والطلبة بداو كيهرّبو بلا نظام، وجاو التعليمات باش يبقاو مجموعين فبلايصهم، بينما البوليس بدا التحقيق على إطلاق النار اللي كان حدا الخزانة.

الجامعة كاينة فوسط مدينة كولومبيا، اللي فيها قرابة 145 ألف نسمة، وكايقرا فيها حوالي 38 ألف طالب.

ولكن من بعد، خرجو مسؤولين أمنيين وقالو بلي ماكاين حتى دليل على أن شي حد ضرب القرطاس، وماكايناش شي تقارير كتقول بلي كان إطلاق النار ولا ضحايا.

الإعلام الأمريكي نشر تصاور وفيديوهات كيقولو بلي ديال المشتبه فيه، اللي باين فيها شاب أبيض لابس سروال كحل وكيشّد شمسيّة فـ يدو.