كود سبور//

مشاو سيمبا التنزاني لبلادهم باش يوجدو لروتور فينال كأس الكونفدرالية الإفريقية ضد نهضة بركان الويكاند الجاي، بعدما سالا ماتش الذهاب بنتيجة 2-0 لمصلحة البركانيين البارح السبت فبركان.

ووصلت ظهر اليوم الاحد طائرة فريق سيمبا التنزاني إلى مطار عاصمة تنزانيا دار السلام، فرحلة جوية خاصة جايا من مطار وجدة، ومعنويات الفريق التنزاني مرتفعة واخا خسرو الذهاب بنتيجة 2-0 أمام نهضة بركان، ومعولين على الريمونتادا قدام جمهورهم، وهذا الشي اللي خاص يرد له البال ممثل الكورة المغربية، ووراه لاعبين سيمبا وجمهورهم كانوا فرحانين بالبارح حيث خسرو غير بنتيجة 2-0، ومعولين يلعبو فينال العمر بتنزانيا.

وحسب مصادر مطلعة، فالأكثر من هذا الشي كايحاولو سيمبا التنزاني يضغطو فليكوليس على الاتحاد الإفريقي لكرة القدم باش يرجع يبرمج ماتش روتور الفينال فتيران بنجامين مكابا بالعاصمة التنزانية دار السلام معقل سيمبا، وهي المدينة اللي عندو فيها قاعدة جماهيرية كبيرة، باش يعاونوه نهار ماتش الروتور يرجع فالنتيجة ويتدارك خسارة الذهاب بجوج لزيرو، وراه راسلو الكونفدرالية الأفريقية وكايحاولو يبدلو قرارها، وهذا الشي بعدما قرر الكاف يحيد الفينال من هذا التيران حيث الأرض ديالو ما صالحاش، وبرمج الماتش فجزيرة زنجبار التنزانية، وراه بداو المسؤولين ديال سيمبا حملة كبيرة لدعم الفريق ديالهم بمساندة الحكومة التنزانية ورئيسة البلاد، وبداو كايشحنو حتى جمهورهم باش يكون ورقة ضغط نهار المباراة.

نهضة بركان خاصهم يكونو واعيين بهذا الشي اللي كايتسناهم فتنزانيا مع سيمبا والجمهور ديالو، ويتعلمو من درس فينال العام الماضي ضد الزمالك المصري، واللي كانو ربحو فيه الذهاب بنتيجة 2-1 فبركان، ولكن خسرو الروتور بنتيجة 1-0 وضيعو اللقب، حيث واخا النهضة ربحو بـ2 لزيرو فلالي، فهذه النتيجة ما فيهاش الثقة، خصوصا وأن التنزانيين معروفين بقوتهم فتيرانهم وعندهم حوايج اخرى كايستغلوها باش يربحو فبلادهم من غير الكورة، بحال الطقس والتبرزيط ديال الجمهور فالتداريب ديال الفريق المنافس ومقر الإقامة ديالو باش يخرجو اللاعبين من التركيز، من غير الضغط اللي كايديروه فالماتش، ومحاولات التأثير على الحكام، وهذا الشي من المفروض يتعامل معه الفريق المغربي بذكاء، وراه عندو دابا ما يكفي من الخبرة باش يعرف يحمي راسو ويدبر الماتش تما فتنزانيا بقيادة المدرب معين الشعباني والمكتب المسير للنادي، ويرجعو بكأس الكونفدرالية الثالثة فتاريخ الفريق للمغرب، بشرط أنهم يفيقو ويديرو بين عينيهم سيناريو فينال العام الماضي ضد الزمالك فالقاهرة بمصر ويخدمو عليه باش ما يتعاودش فدار السلام.