كود سبور//

أكد وليد الركراكي أن المهاجم يوسف النصيري كايدوز من مرحلة صعيبة، وخاصو يعاونو كيفما دار جوزي مورينيو المدرب ديالو ففنربخشة التركي.

وهضر وليد الركراكي وقال خلال الندوة الصحافية للإعلان على لائحة المنتخب المغربي لمواجهة أفريقيا الوسطى برسم الجولة الثالثة والرابعة ضمن إقصائيات كأس إفريقيا 2025: “الموضوع ديالنا حساس مع يوسف النصيري وهو أحسن مهاجم فتاريخ المغرب وماركا فگاع البطولات اللي شارك فيها المغرب، وكايلعب مع فريق كبير (فنربخشة)، وتحت قيادة جوزي مورينيو واحد من أحسن المدربين فالتاريخ”.

وزاد الركراكي وقال: “ممكن مورينيو اللي من أحسن المدربين فالعالم إلى شرا مهاجم ديال 20 مليون أورو ممكن يكون مورينيو ومع احتراماتي له وما عليش أنا ما عنديش ليديتاي، ممكن كايفهم شويا فالكورة داكشي علاش إلى قال مورينيو غايعاون النصيري، حتى أنا غانتبع شويا ديال الثقة ديال مورينيو ولكن لا”.

وكمل وليد الركراكي: “فالثلاثة مهاجمين اللي عندنا دابا كاين سفيان رحيمي اللي غادي مزيان وأيوب الكعبي اللي غادي مزيان ويوسف النصيري اللي كايدوز من وقت ماشي ساهل، والخدمة ديالي كمدرب هي نعاون اللاعببن مرة مرة فالثقة ومؤمن أن يوسف النصيري غايرجع كيفما كان دار فلاكوب ديموند ملي ماركا لنا الهدف التاريخي على البرتغال وغانعاونو كيفما عاونا الزلزولي اللي حتى هو داز من وقت صعيب، وساهل تذبح الريوس والخدمة اللي صعيبة هي التعاون”.