كشف الناخب الوطني وليد الركراكي أنه تعرض للتهديد بالقتل بسبب واقعة ماتش المنتخب المغربي ومنتخب الكوگو الديمقراطية ضمن منافسات كوب دافريك.

وخلال الندوة الصحافية، اللي كتسبق ماتش المغرب وزامبيا، قال وليد الركراكي: “جاوني ميساجات عنصرية والتهديد بالقتل وهذا الشي ما شي معقول وخايب بزاف واتهموني بالعنصرية هاد الأمور وصلت لعائلتي وهذا الشي ضرني”.

وقال الركراكي أيضا: “هادشي ديال الصراع بين اللاعبين ديما كاين فالكورة، راه ماتش هولندا والأرجنتين فالمونديال كانت نايضة فيه الروينة وحنا ما وصلناش لهاد النيفو، فماتش المغرب والكونكو كان الصداع بين اللاعبين، وانا تدخلت باش تفرقهم ولكن للأسف من بعد الماتش تقال بلي قلت شي حاجة عنصرية وانا ما قلتهاش وطبعا غندافع على الصورة ديالي”.

وكمل الركراكي: “هداكشي اللي وقع ممكن بسبب الحرارة والضغط، المهم دابا هذا الشي سالا وما غاديش يؤثر علينا حيث كيبقى هذا الشي ماتش ديال الكورة، وحنا الأفارقة كنا موحدين فكوب دافريك وما جاتس دابا فبطولة افريقية ديالنا نتفرقو”.