كود سبور//

كشف الناخب الوطني المغربي على السبب اللي مخلي المهاجمين المغاربة يتألقو مع الاندية ديالهم، وبالمقابل كيعيشو عقم هجومي مع المنتخب الوطني المغربي.

وهضر الناخب الوطني وليد الركراكي فندوة صحافية اليوم الثلاثاء، وقال: “سفيان رحيمي كيلعب أطاكون هاد الايام مع العين الأماراتي ماشي إيلي، ومع العين الإماراتي كيلعب بأسلوب الارتداد الكونتر أطاك ماشي الاستحواذ على الكورة وملي كيكون فالكونتر أطاك وكيكون عندو ليسباس كيكون لاعب فانتاستيك، ومع أسلوب العين اللي كيخليو الكورة وكيمشيو فالكونتر أطاك كيكون سفيان رحيمي متحرر”.

وعلى شنو السر فأن المهاجمين المغاربة كيتألقو مع الاندية ديالهم وفالمنتخب المغربي كيان عقم هجومي، قال للركراكي: “المنتخبات ماشي هي الاندية، راه الاندية كيخدمو كل نهار وموالفين اللاعبين على بعضهم، اما حنا كايجيو اللاعبين فـ4 ولا 5 ايام وخاصهم يولفو يلعبو مع زياش وباقي اللاعبين، وحنا هذا الشي اللي كنقلبو عليه من خلال الماتشات الوديين وللاسف خاصك شهرين او 3 باش تجمع اللاعبين فأربعة ايام باش نلقاو الحلول بيناتهم والتجاوب، وانا عندي الثقة فهادشي ومتفائل”

وبالنسبة ليوسف النصيري وايوب الكعبي، قال الركراكي: “أنا ديما عندي الثقة فيهم هما احسن المهاجمين اللي عندنا وانا ما غالطش، النصيري يقدر يماركي لينا فأي وقت، والكعبي حتى هو اكد بلي يقدر يماركي لينا والمنافسة بيناتهم مزيانة لينا، وما عنديش الشك فيهم، بالعكس أنا تايق فيهم وكاين فرق ما بين الفريق والمنتخب، وانا والصطاف ديالي اللي خاصنا نلقاو الحل باش يكون مزيانين فليكيب ناسيونال كيفما كيكونو مع الفرق ديالهم”.