كود سبور//

كشف الناخب الوطني وليد الركراكي علاش مازال كيعيط على لاعبين جداد قبل شهرين فقط من انطلاق كاس أفريقيا فالكوت ديفوار، وتحدث على اللاعب الجديد اللي عيط له سفيان ديوب اللي كيلعب مع رين نيس الفرنسي وعلاش صيفط له باش يحضر ضد إريتريا وتنزاتيا ضمن إقصائيات كأس العالم 2026.

وتحث وليد الركراكي، خلال الندوة الصحافية اللي علن فيها على 25 لاعب، ووضح: “قلت ليتيست غيساليو فالجانب التكتيكي ماشي فاللاعبين، اللاعب اللي مزيان راه غيجي وديما كنقلبو على الجودة فاللاعبين وليكيب ناسيونال، ليتيست جربنا مع ليبيريا 2 حتى 3 اللاعبين، جربنا بزاف اللاعبين سوا فالكوت ديفوار، او فالماتشات ديال شهر 6، دابا سيستيم ديال اللعب كنعرفوه والاستعدادات خاصها ترتفع”.

وبخصوص استدعاء سفيان ديوب، قال الركراكي: “سفيان ديوب هو لاعب شاب ملي كنهضر معه بحال إذا كندوي مع امين عدلي، هو ما قدرش يجي قبل من دابا بسبب الجنسية الرياضية والأوراق ديالو وكان موعت من بعد رجع مع نيس الفريق الأول فالبطولة الفرنسية كان لاعب دولي فالفئات السنية ديال فرنسا كان فموناكو من قبل، لاعب عندو موهبة هو لاعب يقدر يلعب فالوسط والجناب وهو لاعب اختار المغرب وهو اتخذ هذا القرار مدة هادي ولكن كان موعت داكشي علاش ما قدرش يجي راه ماركا آخر ماتش ضد رين ، مزيان يجي يعرف الكروب ديال المنتخب المغربي قبل لاكوب دافريك، ما عرفناش واش غيكون معنا فكاس إفريقيا او لا الله أعلم، ولكن هو كاين معنا دابا”.