كود سبور- وجدة//
كشف الناخب الوطني وليد الركراكي على الحالة الصحية لكل من اسامة صحراوي وشمس الدين طالبي، اللي موعتين وموحال يلعبو مع المنتخب الماتش الجاي ضد تنزانيا برسم الجولة 6 من اقصائيات كاس العالم 2026.
وهضر وليد الركراكي بعد نهاية ماتش المغرب والنيجر، اللي غابو عليه اللاعبين بجوج، وقال: “طالبي وصحراوي موعتين وعييت لهم حيث المهم عندي هو يدخلو فالگروب، حيث كنت نقدر نجيب غير 24 لاعب وغايبان هذا الشي معقول، وانا ديما كانجيب عدد اكبر من اللاعبين باش الدراري يولفو الگروب، ويخدمو معنا ويعرفو التكتيك باش ما نضيعوش التجمع الاعدادي، وهذا الشي اللي درنا مع شمس الدين طالبي وصحراوي”.
وكمل الركراكي وقال: “دابا عندنا 3 ايام باش نشوفو الثلاثاء الجاي واش يقدرو يدخلو معنا، ولا لا وغانشوفو مع الطبيب، دابا الطالبي كايتحسن، وصحراوي ولى مزيان على ما كان عليه من قبل، وطالبي يقدر دخل الماتش ديال الثلاثاء، وصحراوي خاصنا يومين باش نحكمو على الحالة ديالو”.
