كود سبور//

كشف الناخب الوطني وليد الركراكي على الحالة الصحية ديال ايوب الكعبي لاعب أولمبياكوس اليوناني واللي غاب على لاليست المنتخب المغربي ضد النيجر وتنزانيا، وهضر على الوضع ديال نايل العيناوي لاعب لانس الفرنسي اللي مازال ما اختار المنتخب المغربي، ونفى الركراكي واش تواصل مع عيسى ديوب لاعب فولهام باش يجي للمنتخب.

وقال وليد الركراكي: “ايوب الكعبي توعت مع أولمبياكوس وتسنينا حتى البارح بالليل باش نعرفو الوضع ديالو، ودار واحد الفحص مع الفريق ديالو الأربعاء اللي فات وحاس بواحد الألم، ومازال عندو 10 ايام ديال الراحة ومع الأسف ما يقدرش يكون معنا، وايوب الكعبي كون ما كانش موعت كان غايكون معنا، وعطيت الفرصة لحمزة ايگمان يجي بلاصتو”.

وضوح الركراكي بخصوص نايل العيناوي: “كاينين بزاف ديال الأخبار الكاذبة اللي ما كايعاونوناش حتى حنا وما كايعاونوش المنتخب، وخاصنا نكونو إيجابيين ديما والمعلومة تكون صحيحة على قبل الاستقرار ديال الفريق، وبخصوص نايل العيناوي كنت عطيت له فمارس اللي فات قبل من عام، باش يجي للمنتخب وكان باغي يتسنى ويصبر، وانا خليت الباب مفتوح ومازال ديما مفتوح، ولكن اللي كانبغي نقول للعيناوي ولأي لاعب راه الباب ديما مفتوح ولكن راه المغرب كبير على اي واحد، واللي باغي يلعب مع المنتخب كايبين هذا الشي وكايعطي مؤشرات ورسائل انه موجود وباغي يلعب وملي كانشوف هاد الميساجات، راه واخا ندابز معه ولا اللعب ديالو ما نبغيهش راه نقدر نعيط له بهدف ان المغرب يربح، نايل العيناوي بروفايل وعندو امكانيات وموهبة ولكن أنا محتاج للاعبين متأكدين 100% باغيين يلعبو مع المغرب ويعطيو كل ما عندهم حيث جاي كوب دافريك، وباغيين يعاونو المنتخب ويضاربو على بلاصتهم، وبالنسبة العيناوي الباب ديال ليكيب ناسيونال مفتوح ولكن الميساج خاصو يجي من عندو”.

بالنسبة لعيسى ديوب، نفى الركراكي واش عيط له باش يلعب مع المغرب، واكد انه مستبعد يعيط له: “راه عمري ما گلست معه ولا هضرت معه وعمرو هو ولا المحيط ديالو عطاو مؤشرات على انه باغي يلعب مع المغرب، وملي لاعب ما عطاش مؤشر انه باغي يلعب مع المغرب وانا ماشي غانبقى نمشي ندق ديما على اللاعبين ونطلبهم يجيو يلعبو مع المغرب، راه عندي نفس مغربية وكانقول ان كان وغايكون ديما، واللي غايجي مرحبا به واه هذا التوني افتخار وكاين 40 مليون مغربي باغي يلبسو، اما عيسى ديوب عمرني تواصلت معه وما كانظنش غانتواصل معه وراه عمري دويت معه”.